तरी मनसेच्या नेतृत्वाने मात्र सर्व जागांचे वाटप पूर्ण करा आणि मगच युतीची घोषणा करा असा पवित्रा घेतला होता. त्यामुळेच ठाकरे बंधूंची युती होण्यास काहीसा विलंब झाला. मात्र आता जागावाटप निश्चित होत असल्याने आज, बुधवारी त्यांच्या युतीची घोषणा होणार असल्याचे कळते. शिवसेना उबाठा पक्षाचे खासदार संजय राऊत यांनी तसे ‘एक्स’ द्वारे संकेत दिले आहेत.

ठाकरे बंधूंचं ठरलं! संजय राऊतांनी उद्याचं लोकेशन सांगितलं; आदित्य ठाकरेंशी खास कनेक्शन
मराठी मतदारांची संख्या ज्या ठिकाणी सर्वाधिक आहे त्याच जागांवर शिवसेना उबाठा पक्ष आणि मनसे या दोन्ही पक्षांकडून सुरुवातीला दावे करण्यात आले होते. यातही प्रामुख्याने वरळी, शिवडी, दादर, माहिम, विक्रोळी, भांडुप यांसारख्या विधानसभा मतदारसंघात जिथे शिवसेना उबाठाचे सर्वाधिक नगरसेवक निवडून आले आहेत, त्याच जागांवर मनसेनेही दावा केला होता. त्यातून ठाकरे यांच्या शिवसेनेकडून जवळपास मार्ग काढला असला तरी दादर, माहीम आणि शिवडीमधील काही जागांवर चर्चा बाकी होती.

‘उबाठा-मनसे युतीबाबत कोणाच्याही मनात संभ्रम नाही. नाशिक, पुणे, कल्याण-डोबिंवली, ठाणे आणि मिरा-भाईंदर पालिकेची चर्चा संपली आहे. आता इतक्या पालिकांचे काम करत असताना थोडा वेळ लागत असतो. दोन्ही बाजूंच्या कार्यकर्त्यांच्या भावना समजून घेतल्या पाहिजेत. काही विद्यमान नगरसेवक असतात, त्यांच्या जागांची आदलाबदल युतीमध्ये होत असते. त्यासाठी एकत्र बसवून मार्ग काढावा लागतो. आता या सर्व गोष्टी जवळजवळ पूर्ण झाल्या आहेत. एबी फॉर्मचेही वाटप झाले आहे’, असे संजय राऊत यांनी सांगितले.

‘मनापासून एकत्र’

‘राज ठाकरे आणि उद्धव ठाकरे यांच्यासह आम्ही सर्वजण एकमेकांशी संपर्कात आहोत. आम्ही दोन्ही पक्ष मनापासून एकत्र आहोत. जागावाटपाबद्दल ताणतणाव नाही. भांडुप आणि इतर जे काही भाग आहेत ज्याविषयी तुम्ही बोलत आहात, ते त्यांच्याकडे गेले काय आणि आमच्याकडे राहिले हे सर्व एकच आहे’, असेही संजय राऊत म्हणाले.