मूळ मुंबई-गोवा महामार्गाचे आता चौपदरीकरण होत आहे. त्यातील पनवेल-कासू-इंदापूर या ८४ किमीच्या टप्प्याचे काम भारतीय राष्ट्रीय महामार्ग प्राधिकरणाकडून (एनएचएआय) होत आहे. ते काम जवळपास पूर्ण झाले आहे. मात्र, महामार्गावरील खरा त्रास हा इंदापूरपासूनच सुरू होतो. इंदापूर ते झारप या जवळपास ४९० किमीच्या मार्गाचा विस्तार केंद्रीय रस्ते वाहतूक व महामार्ग मंत्रालयाकडून थेट सुरू आहे.

Thane-CSMT Flyover: ठाणे-सीएसएमटी प्रवास सुस्साट! शीव उड्डाणपुलाच्या समांतर दोन पदरी पूल उभारणार; कसा असेल नवा मार्ग?

त्यातील सर्वात मोठा अडथळा हा इंदापूर येथील तीन किमीचे बाह्यवळण व माणगाव येथील सात किमीचे बाह्यवळण हे आहे. हे दोन्ही बाह्यवळण मूळ कामाच्या कंत्राटाचा भाग असतानाही ते झाले नाही. त्यामुळे ‘मॉर्थ’ने सहा महिन्यांपूर्वी नव्याने निविदा जाहीर केली. त्यानंतर आता ते काम सुरू झाले असून पूर्ण होण्यास किमान मार्च २०२७ उजाडणार आहे. यामुळेच इंदापूर व माणगाव, या भागातून हा महामार्ग ओलांडताना वाहतूककोंडीत वाहनचालकांना तारेवरची कसरत करावी लागत असल्याची स्थिती आहे.

माणगावपासून पुढे महामार्ग तसा चांगला आहे. परशुराम घाटापासून पुढे झारपपर्यंतचा जवळपास तयार आहे. मात्र लांजा, निवळी, पाली व संगमेश्वर या ठिकाणी उड्डाणपुलांची कामे सुरू असल्याचा फटका वाहनचालकांना दोन वर्षांपासून बसत आहे. आता येत्या मार्च २०२६ पर्यंत हे उड्डाणपूल बांधून पूर्ण होतील व त्यावरून वाहतूक सुरू होईल, असे मंत्रालयाच्यामहामार्ग अधिकाऱ्यांचे म्हणणे आहे.

बांधकाम टप्पे असे

पनवेल-कासू – ४२.३, कासू-इंदापूर – ४२.३
(वरील दोन्ही टप्पे एनएचएआयकडून बांधकाम)
इंदापूर-वडपाले – २६.७५, वडपाले-भोगाव खुर्द – ३८.७६, भोगाव खुर्द-कशेडी – ८.९५, कशेडी-परशूराम – ४३.४३, परशूराम घाट-अरवली – ३४.४५, अरवली-कांटे – ३९.२४, कांटे-वाकेड – ४९.१५, वाकेड-तळगाव – ३३.२५, तळगाव-कळमठ – ३८.३८, कळमठ-झारप – ४३.९०
(केंद्रीय रस्ते वाहतूक व महामार्ग मंत्रालयाकडून वरील सर्व टप्प्यांचे बांधकाम)