गोरेगाव-मुलुंड जोड मार्ग हा मुंबईमधील पूर्व आणि पश्चिम उपनगरांना एकमेकांशी जोडणारा चौथा प्रमुख जोडरस्ता आहे. विशेषतः उत्तर मुंबईतील वाहतुकीला याचा मोठा फायदा होणार आहे. सुमारे १२.२० किलोमीटरच्या या प्रकल्पामुळे पूर्व-पश्चिम उपनगरांदरम्यान नवीन जोडरस्ता तयार होईल आणि नागरिकांना वाहतूक कोंडीपासून दिलासा मिळेल. गोरेगाव ते मुलुंडदरम्यान प्रवासाचा कालावधी ७५ मिनिटांवरून सुमारे २५ मिनिटांपर्यंत कमी होईल. इंधन वापरात बचत होण्यासह मुंबईच्या वायू गुणवत्ता निर्देशांकातही सुधारणा होणार आहे.

Eknath Shinde: मुंबई झोपडपट्टीमुक्त करण्याची तयारी! 17 ठिकाणी पुनर्विकास प्रकल्प; एकनाथ शिंदेंचा मेगा प्लॅन काय?

कसा असेल नवा मार्ग?

गोरेगाव-मुलुंड जोड मार्ग प्रकल्प एकूण चार टप्प्यांमध्ये प्रस्तावित आहे. टप्पा तीन (अ) मध्ये उड्डाणपूल, एलिव्हेटेड रोड बांधकामाचा समावेश आहे. या प्रकल्पांतर्गत दिंडोशी- गोरेगाव फिल्मसिटीदरम्यान सहापदरी उड्डाणपुलाचे काम सुरू आहे. आता चौथ्या टप्प्यातील कामाला गती देण्यासाठी महापालिकेने निविदा काढली आहे. चौथा टप्पा गोरेगाव पूर्व ऑबेरॉय मॉल येथील पश्चिम द्रुतगती मार्गाखालून भुयारी मार्ग आणि ऐरोली जंक्शन मुलुंड पूर्व येथे उड्डाणपूल होणार आहे. यासह अन्य कामेही केली जाणार असून त्यामुळे या टप्प्याचा खर्च एक हजार २९३ कोटी रुपये आहे. चौथा टप्पा तीन वर्षांत पूर्ण करण्यात येणार आहे. यामध्ये पूर्व द्रुतगती महामार्ग आणि गोरेगाव-मुलुंड लिंक रोड जंक्शनमध्ये सुधारणा होणार आहे. गोरेगाव-मुलुंड जोडरस्ता चार टप्प्यांत करताना पहिल्या टप्प्यात नाहूर येथील रेल्वे मार्गावर उड्डाणपुलाचे काम असून ते जवळपास पूर्ण झाले आहे. तर दुसऱ्या टप्प्यात गोरेगाव मुलुंड जोडरस्ता रुंदीकरण असून तेही पूर्णत्वास येत आहे.

जुळे बोगदे

प्रकल्पात गोरेगाव पूर्व येथून ४.७० किलोमीटर लांबीचे दोन भूमिगत जुळे बोगदे असून त्यामुळे प्रवास झटपट होण्यासाठी मदत मिळणार आहे. हे बोगदे खणण्यासाठी महाकाय टीबीएम (टनेल बोअरिंग मशीन) मशीनची मदत घेण्यात येणार आहे. दादासाहेब फाळके चित्रनगरी ते पूर्व उपनगरांमध्ये मुलुंड येथे खिंडीपाडापर्यंत जुळे व भूमिगत बोगदे बांधण्यात येतील.