मराठवाड्यात चार दिवसांपासून मुसळधार पावसामुळे जनजीवन विस्कळीत झाले आहे. विशेषत: बीड जिल्ह्याला पावसाचा सर्वाधिक फटका बसला आहे. अंबेजोगाई, परळी, आष्टी, पाटोदा, केज तालुक्यात मुसळधार पाऊस झाला आहे. पूर परिस्थितीमुळे काही गावांचा संपर्क तुटला आहे. मराठवाड्यात ३२ महसूल मंडळांमध्ये अतिवृष्टी झाली. आष्टी तालुक्यातील कडा, पिंपरखेड, निमगाव चोभा या भागामध्ये सोमवारी सकाळपर्यंतच्या २४ तासांमध्ये झालेल्या अतिवृष्टी व ढगफुटीमुळे कांबळी, कडी नदीला महापूर आला. धामणगाव येथील अफरोज बागवान (वय ३०) व घाटा पिंपरी येथील श्रावण तुकाराम शिंदे (वय ५९) हे पुरात वाहून गेले. अचानक मोठ्या प्रमाणात पुराचे पाणी लोकवस्त्यांमध्ये शिरल्याने नागरिक पुरात अडकले. पुरात अडकलेल्यांना लष्कराच्या हेलिकॉप्टरमधून ५१ जणांना बाहेर काढण्यात आले.
Maharashtra Rain: राज्यात सर्वदूर मुसळधार पाऊस; मराठवाडा, विदर्भ, पश्चिम महाराष्ट्रात अतिवृष्टी, पाहा कुठे काय परिस्थिती?
आमठाणा मंडळात ढगफुटी
सिल्लोड : आमठाणा मंडळात सोमवारी पहाटे तीन तास ढगफुटीसदृश मुसळधार पाऊस पडला. या पावसाने नदी-नाल्यांना पूरपाणी आल्याने परिसरातील गावांचा संपर्क तुटला होता. मोठ्या प्रमाणात पिकांची नासाडी झाली. सिल्लोड तालुक्यातील आमठाणा मंडळांमध्ये सोमवारी सकाळी तीन ते सहापर्यंत अतिवृष्टी होऊन ७० मिमी पावसाची नोंद झाली. देऊळगाव बाजार येथे चारना नदीला पूर आल्यामुळे नदीकाठच्या एका दुकानात थांबलेल्या काही नागरिकांना जीव वाचवण्यासाठी छतावर बसवावे लागले. त्या नागरिकांना नदीच्या पाण्यातून सुखरूप बाहेर काढले. दरम्यान, नुकसानीचे पंचनामे करण्याच्या सूचना तहसीलदार यांना दिल्याची माहिती आमदार अब्दुल सत्तार यांनी दिली.

वैजापूर परिसरातही जोरदार
वैजापूर : वैजापूर शहर व परिसराला सोमवारी पावसाने झोडपले.
Chhatrapati Sambhajinagar Rain : संभाजीनगरात पावसाचा कहर! अनेक गावांना पुराचा तडाखा, शेतीमध्ये पाणीच पाणी; विदारक चित्र
जिल्हानिहाय पाऊस (मिमी)
बीड : ३७.१
परभणी : २४.८
लातूर : २४.४
हिंगोली : १४.२
छत्रपती संभाजीनगर: ५.५
जालना : २.८

• बीड जिल्ह्यातील नळवंडी, नेकनूर, येळंबघाट, कडा, टाकळसिंग, डवळा वडगाव, धानोरा, पिंपळा, दादेगाव, पाटोदा, लोखंडी, केज, युसूफ, होळ आणि शिरुर या मंडळात अतिवृष्टी
• लातूर जिल्ह्यातील लातूर, कासारखेडा, मोघा, तोंडार आणि धाराशिव जिल्ह्यातील बेंबळी, पडोळी, कासेगाव, तुळजापूर, अनाळा, कळंब, इटकूर या मंडळात अतिवृष्टी
• परभणी जिल्ह्यातील परभणी, माखणी, बोरी, दुधगाव आणि हिंगोली जिल्ह्यातील वाकोडी, डोंगरकडा मंडळात अतिवृष्टी, शिरुर मंडळात १०४ मिमी पाऊस
• बीड जिल्ह्यात रात्री मुसळधार पाऊस झाल्यानंतर केकाणवाडी पाझर तलाव आणि राक्षसवाडी साठवण तलाव फुटला. पुलावर पाणी आल्यामुळे गावांचा संपर्क तुटला
• गेल्या २४ तासांत विभागात १७.५ मिमी पाऊस झाला. धाराशिव जिल्ह्यात २८.२ मिमी पाऊस