अवघ्या काही दिवसांवर आलेल्या गणेशोत्सवाच्या पार्श्वभूमीवर छत्रपती संभाजीनगर शहरातील पोलीस आयुक्तालय शांतता समितीच्या बैठकीच्या आयोजन करण्यात आलं होतं. यावेळी मंत्री संजय शिरसाट बोलत होते. या बैठकीसाठी विधान परिषदेचे विरोधी पक्षनेते अंबादास दानवे, माजी केंद्रीय अर्थराज्यमंत्री खा. भागवत कराड, खा. कल्याण काळे, आ. प्रदीप जयस्वाल, जिल्हाधिकारी दिलीप स्वामी, मनपा आयुक्त जी श्रीकांत, पोलीस आयुक्त प्रवीण पवार, शिवसेनेचे जिल्हाप्रमुख राजेंद्र जंजाळ आणि इतर पदाधिकारी उपस्थित होते.

‘माझा एक कार्यकर्ता आला. त्याने माझे तोंडभरून कौतुक केलं. कार्यकर्त्याने ८ लाखांचा डीजे आणला तिथे मला बोलावलं. माझ्यासाठी १०० किलोंचा फुलांचा हार आणला. मला वाटलं माझ्या वजनापेक्षा जास्त वजनाचा तो हार गळ्यात टाकून फाशी देतो की काय? अंबादास दानवे देवा शप्पथ सांगतो, माझ्या हृदयाचे ठोके वाढले होते. आठ लाखांच्या डीजेचा एवढा आवाज की मी तिथे खालपासून वरपर्यंत थरथरत होतो. डीजेमुळे शारीरिक नुकसान होऊ शकतं, त्यामुळे डीजे वापरू नका…’ असा किस्सा शिरसाटांनी सांगितला.

डीजेपेक्षा बँड लावा, पैसे कमी पडले तर…

शिरसाट पुढे म्हणाले, सर्व गणेश मंडळाचे अध्यक्षांना माझा आव्हान आहे डीजे बंद ठेवा. माझ्याकडे एक व्यक्ती आला तो म्हणाला सुप्रीम कोर्टाचा आदेशावरून पोलिसांनी भोंगे उतरवले. तुम्ही डीजे बद्दल काय करणार सांगा म्हणाला. भोंगे उतरवल्यानंतर आता काही लोक वाद कसा पेटेल यासाठी डोळ्यात तेल घालून बसले आहे. यामुळे डीजे लावू नका, मी गणेश मंडळाच्या अध्यक्षांना विनंती करतो. डीजे पेक्षा चाळीसगाव, वैजापूरचा बैंड लावा पैसे कमी पडले तर सगळे नेते आहेतच. काही नाही जमलं तर मी आहेच. माझी बॅग उघडीच आहे. व्हिडिओ चालत राहतील. शिरसाट याची चिंता करतो का? उलट लोक आपल्याला करोडपती समजत असेल तर आपल्या बापाचं काय जात? माझा हा डायलॉग देखील फेमस झाला आहे, असे शिरसाटांनी म्हटल्याने अनेकांच्या भुवया उंचावल्या आहेत.