मिरारोड पूर्वेला असलेल्या बालाजी सर्कल परिसरातील जोधपूर स्वीट आणि नमकीन दुकानात २ जुलैला राडा झाला. इथल्या कर्मचाऱ्यानं मराठी बोलण्यास नकार दिल्यानं मनसेच्या कार्यकर्त्यांनी त्याला चोप दिला. त्यामुळे वातावरण तापलं. मनसेच्या कार्यकर्त्यांविरोधात पोलिसांनी गुन्हे नोंदवले. यानंतर ४ जुलैला या भागातील दुकानदार आणि व्यापार्‍यांनी बंद पाळत एकी दाखवली. मनसेकडून झालेल्या मारहाणीचा निषेध केला. या व्यापाऱ्यांनी मोर्चादेखील काढला.

व्यापाऱ्यांच्या मोर्चाला प्रत्युत्तर देण्यासाठी मनसे नं मोर्चा काढला. ८ जुलैला मनसैनिक रस्त्यावर उतरले. या मोर्चाला पोलिसांनी परवानगी नाकारल्यानं मोठा गोंधळ झाला. मनसेच्या नेत्यांना नजरकैदेत ठेवण्यात आलं. काहींना मिरारोडपासून दूर नेण्यात आलं. पण तरीही मनसैनिकांनी मोर्चा यशस्वी केला. त्यानंतर आता मनसे प्रमुख राज ठाकरे मिरारोडमध्ये येत आहेत. त्यांची सभा थोड्याच वेळात बालाजी सर्कलमध्ये होईल. राज यांच्या सभेला पोलिसांनी सशर्त परवानगी दिली आहे.

बालाजी सर्कल परिसरात राज यांची सभा होणार आहे. ज्या जोधपूर स्वीट आणि नमकीन दुकानातून मराठी विरुद्ध अमराठी वाद पेटला, त्या दुकानापासून ३०० मीटर अंतरावर राज ठाकरेंची सभा होणार आहे. या भागात पोलिसांचा तगडा बंदोबस्त तैनात आहे. दुकानाजवळ पोलिसांचा फौजफाटा लावण्यात आलेला आहे. अनुचित प्रकार टाळण्यासाठी पोलीस सतर्क आहेत.

जोधपूर स्वीट आणि नमकीन दुकान आज सकाळी उघडण्यात आलं होतं. दुपारपर्यंत ते खुलं होतं. पण त्यानंतर ते बंद करण्यात आलं. खबरदारीचा आणि सुरक्षेचा उपाय म्हणून दुकानदारानं दुपारच्या सुमारास दुकान बंद केलं. सध्या दुकानाच्या परिसरात पोलिसांचा मोठा बंदोबस्त पाहायला मिळत आहे.