विवाह सोहळ्याला जाताना अपघात, उपचारादरम्यान मृत्यू

वासुदेव शेळके हे आपल्या नातेवाइकाच्या विवाह सोहळ्यासाठी जात असताना मानोरा ते तळप मार्गावर त्यांच्या कारचा भीषण अपघात झाला. अपघातात ते गंभीर जखमी जखमी झाले होते. त्यामुळे त्यांना तातडीने वाशिम येथील रुग्णालयात हलवण्यात आले. मात्र, डॉक्टरांचे सर्व प्रयत्न निष्फळ ठरले. रुग्णालयात उपचारादरम्यान वासुदेव शेळके यांनी अखेरचा श्वास घेतला.

गुवाहाटी येथे बीएसएफमध्ये सेवेत कार्यरत असलेले वासुदेव शेळके रजेवर गावी आले होते. काही महिन्यांनंतर ते सेवानिवृत्त होणार होते. त्यासाठी त्यांनी आवश्यक कागदपत्रांची तयारीही सुरू केली होती. सेवानिवृत्तीनंतर गावात नगरभोजन देण्यासाठी त्यांनी अगोदरच ९ क्विंटल गहू साठवून ठेवले होते. दुर्दैवाचे चक्र असे फिरले की, ते गहू आता त्यांच्या तेरवीच्या कार्यात वापरले जाणार आहेत, याची कल्पनाही त्यांनी कधी केली नसेल.

कुटुंबाला मोठा धक्का

मृदू, प्रेमळ आणि मनमिळावू स्वभावाच्या वासुदेव शेळके यांनी आपल्या सेवाभावी वृत्तीने परिसरात एक वेगळी ओळख निर्माण केली होती. त्यांच्या अचानक झालेल्या निधनामुळे गावात एकच हळहळ व्यक्त होत असून, प्रत्येकाच्या डोळ्यांत अश्रू दाटले आहेत. त्यांच्या पश्चात पत्नी, एक मुलगा, आई-वडील आणि सर्व कुटुंबीय असा परिवार असून या घटनेमुळे त्यांच्यावर दुःखाचा डोंगर कोसळला आहे.

सहकाऱ्यांकडून जवानाला मानवंदना

पुलगावहून आलेल्या बटालियनच्या जवानांनी शोकसभेत सामील होत आपल्या सहकाऱ्याला सशस्त्र मानवंदना दिली. यावेळी तहसीलदार रवि राठोड, मंडळ अधिकारी मोहन श्रावणे, परिसरातील नागरिक मित्र परिवार, ग्रामपंचायत सरपंच, सदस्य तसेच ग्रामस्थ मोठ्या संख्येने उपस्थित होते.