बुलढाण्याचे शिवसेनेचे आमदार संजय गायकवाड यांना पोलिसांविषयी वादग्रस्त वक्तव्य करणं चांगलंच महागात पडलंय. पोलिसांविरोधात वक्तव्य केल्याने संतापलेल्या मुख्यमंत्री देवेंद्र फडणवीस यांनीही गायकवाडांना खडेबोल सुनावले. पोलिसांबद्दल असं बोलणं योग्य नाही असं म्हणत उपमुख्यमंत्री एकनाथ शिंदे यांनी संजय गायकवाड यांना कडक समज द्यावी, हे असं चालणार नाही, अशी तिखट प्रतिक्रिया दिली होती. तर वारंवार ते जर असं बोलत असतील तर त्यांच्यावर ॲक्शन घेऊ असा इशाराही देवेंद्र फडणवीस यांनी दिला होता. त्यानंतर आता आमदार संजय गायकवाड यांच्या विरोधात ॲक्शन घेत त्यांचेवर गुन्हा दाखल करण्यात आलाय. विशेष म्हणजे आज एकनाथ शिंदे बुलढाणा जिल्ह्याच्या दौऱ्यावर असणार आहेत, पण त्यापूर्वीच गायकवाडांवर कारवाई करण्यात आलीये त्यामुळे जिल्ह्यात चर्चा रंगलीय. बुलढाणा शहर पोलीस स्थानकात गायकवाडांविरोधात तक्रार देण्यात आली होती. त्यानुसार या गुन्हा दाखल करण्यात आलाय. फडणवीसांच्या तंबीनंतर शिंदेंनीही रात्रीच संजय गायकवाडांना फोन केला आणि समजही दिली. तर यानंतर आता गायकवाडांनी माध्यमांशी बोलताना दिलगिरी व्यक्त केलीय