तपासणीदरम्यान, या ठिकाणी गर्भपात करण्यासाठी लागणारे विविध साहित्य आढळून आले. प्रशासनाने हे सर्व साहित्य ताब्यात घेतले आहे. केंद्र चालक आणि तेथे कार्यरत असलेल्या महिलेला ताब्यात घेण्यात आले आहे. अनधिकृत गर्भपात केंद्र चालवणे कायद्याने गुन्हा आहे. त्यामुळे याबाबत पुढील तपास सुरू असून, संबंधितांवर कायदेशीर कारवाई करण्यात येणार आहे. धुळ्यातील महिलांच्या आरोग्यासाठी अशा अनधिकृत केंद्रांवर कठोर कारवाई होणे आवश्यक आहे, अशी मागणी नागरिकांकडून होत आहे.

जिल्हाधिकारी जितेंद्र पापळकर यांनी नुकत्याच घेतलेल्या बैठकीत धुळे जिल्ह्यात मुलींचा जन्मदर योग्य राहावा यासाठी गर्भलिंग तपासणी प्रतिबंध कायद्याचे योग्य प्रकारे अंमलबजावणी व्हावी यासाठी जिल्ह्यातील संशयास्पद गर्भलिंग चाचणी आणि गर्भपात केंद्रे, सोनोग्राफी सेंटर यांची अचानक तपासणी करुन कारवाई करण्याचे आदेश दिले होते. या अनुषंगान आज महानगर पालिकेच्या वैद्यकिय अधिकारी डॉ. संपदा कुलकर्णी, अन्न औषध प्रशासनाच्या सहाय्यक आयुक्त वर्षा महाजन, नायब तहसिलदार अविनाश सोनकांबळे, जिल्हा विधी सल्लागार ॲड. मिरा माळी व सहाय्यक पोलिस निरीक्षक वसंत गोंधळी, पो. कॉ. मोनाली पगारे यांच्या पथकाने ही कारवाई केली.
Disha Salian प्रकरणात आता पेनड्राईव्हची एन्ट्री, काहीतरी मोठी माहिती समोर येणार?

महिला अधिकाऱ्यांनी सांगितला कारवाईचा थरार

यासंदर्भात डॉ. संपदा कुलकर्णी यांनी माहिती दिली. “शासनाच्या आमची मुलगी वेबसाईटवर प्राप्त तक्रारीनुसार आज धुळ्यातील साक्री रोडवरील सुमन हॉस्पिटलमध्ये बेकायदेशीरपणे गर्भपात केले जात असल्याच्या संशयावरुन आज अचानक तपासणी करण्यात आली. यावेळी आढळून आलेल्या रुग्ण महिलेची विचारपूस केली असता ती याआधी सुरत येथून गर्भलिंग तपासणी करुन आली होती. यानंतर सुमन हॉस्पिटल मधील डॉ. सोनल वानखेडे यांच्याकडे येवून तिने गर्भपात करुन घेण्यासाठी सल्ला घेतला. तीन दिवसांपूर्वी डॉ. सोनल वानखेडे यांनी संबंधित महिलेला गर्भपात करण्याचा सल्ला दिल्याने ती आज या ठिकाणी आल्याचे प्राथमिक माहिती मिळाली आहे. तत्पुर्वी संबंधीत महिलेला काही औषधे देण्यात आली होती. साधारण साडेचार हजाराची औषधेही या रुग्ण महिलेने खरेदी केल्याचे सांगण्यात आले”, अशी माहिती डॉ. संपदा कुलकर्णी यांनी दिली.

याचवेळी एका बंद खोलीतून एका महिलेचा आवाज आला. यामुळे संशय बळावल्याने आम्ही त्या खोलीकडे गेलो असता, ती खोली आतून कडीबंद असल्याचे लक्षात आले. यावेळी रक्ताळलेल्या अवस्थेत साडेतीन महिन्याचा गर्भ पडलेला दिसला. ही गोष्ट डॉक्टर म्हणून मला देखील धक्कादायक वाटली. यामुळे आजच्या चौकशीचा पंचनामा करुन जिल्हाधिकाऱ्यांकडे तो सादर करण्यात येणार आहे. यानंतर डॉक्टर वानखेडे यांच्या विरुद्ध गुन्हा दाखल करण्याची प्रक्रिया पूर्ण होऊ शकेल, अशी माहिती डॉ. संपदा कुलकर्णी यांनी दिली. दरम्यान, या कारवाईमुळे वैद्यकीय विश्वात खळबळ उडाली आहे. धुळे शहरासह जिल्ह्यातील सोनोग्राफी सेंटर, गर्भपात, प्रसुती रुग्णालयांमधील कारभार चौकशी अधिक व्यापक होण्याची आवश्यकता व्यक्त केली जात आहे.