म. टा. प्रतिनिधी, पुणे: लहान-थोर ज्याची आतुरतेने वाट पाहत होते त्या गजाननाचे सोमवारी दिमाखात आगमन झाले. आसमंतात दुपारी सप्तरंगांची उधळण आणि सायंकाळी पावसाच्या सरीने गणपतीचे स्वागत केले. मांगल्याचे प्रतीक अन् बुद्धीची देवता असलेल्या मंगलमूर्ती गणरायाच्या आगमनाने सगळीकडे चैतन्य पसरले आहे. घरोघरी आणि सार्वजनिक मंडळांच्या उत्सवाला सुरुवात झाल्याने पुढील अकरा दिवस उत्साहाचे आणि भारावलेले असतील. गणपतीबाप्पाच्या आगमनाच्या दिवशी मेट्रोला प्रवाशांकडून तुफान प्रतिसाद मिळाल्याचे दिसून आले. रात्री सातपर्यंत एक लाख ९५ हजार प्रवाशांनी मेट्रोतून प्रवास केला. मंडई मेट्रो स्थानकातून सर्वाधिक ३२ हजार प्रवाशांनी प्रवास केला आहे.
गणेशोत्सवाच्या काळात मेट्रोची प्रवासीसंख्या वाढणार असल्याचे गृहीत धरून ‘महामेट्रो’कडून नियोजन करण्यात आले आहे. बाप्पाच्या आगमनाच्या दिवशीच शहराच्या मध्यवस्तीमध्ये नागरिकांनी गर्दी केली होती. त्यामुळे मेट्रोला प्रवाशांचा मोठा प्रतिसाद मिळाल्याचे दिसून आले. नागरिकांनी मध्यवस्तीमध्ये खरेदी, बाप्पाचे दर्शन घेण्यासाठी गर्दी केली होती. त्यामुळे मंडई मेट्रो स्थानकाचा वापर सर्वाधिक झाल्याचे दिसून आले. मंडई स्थानकात गर्दी झाल्यानंतर प्रवाशांना दुसरी मेट्रो येईपर्यंत थांबवून ठेवले जात होते. गर्दीमुळे दर पाच मिनिटांला मेट्रो सोडण्यात येत होती. रात्री सातपर्यंत एक लाख ९५ हजार प्रवाशांनी प्रवास केल्याचे दिसून आले. त्यानंतर पीसीएमसी येथून २१ हजार, तर रामवाडी येथून १९ हजार प्रवाशांनी प्रवास केला.
कसं आहे मेट्रो प्रशासनाचे नियोजन?
गणेशोत्सवाच्या कालावधीत पुण्यात १४ ते २५ सप्टेंबरदरम्यान गर्दीच्या वेळेत पाच मिनिटांच्या अंतराने मेट्रो फेऱ्या उपलब्ध करून देण्यात येणार आहेत. १७ ते २४ सप्टेंबरदरम्यान मेट्रोची सेवा मध्यरात्री दोन वाजेपर्यंत सुरू राहणार आहे. अनंत चतुर्दशीच्या पार्श्वभूमीवर २५ सप्टेंबर सकाळी सहा ते २६ सप्टेंबर रात्री ११ वाजेपर्यंत तब्बल ४१ तास मेट्रो सेवा अखंडित सुरू राहणार आहे. गणेशोत्सवाच्या सुरुवातीच्या टप्प्यात १४ ते १६ सप्टेंबरदरम्यान मेट्रोची नियमित सेवा सकाळी सहा ते रात्री ११ वाजेपर्यंत सुरू राहील. त्यानंतर १७ ते २४ सप्टेंबरदरम्यान विशेष वेळापत्रक लागू करण्यात येणार असून, या काळात सकाळी सहा ते मध्यरात्री दोनपर्यंत मेट्रो धावेल. त्यामुळे रात्री उशिरापर्यंत गणपती व देखावे पाहण्यासाठी येणाऱ्यांना मोठा दिलासा मिळणार आहे.
पुण्यात गणरायाचे दिमाखात आगमन
पुण्याच्या वैभवशाली आणि चैतन्यदायी गणेशोत्सवाला सोमवारी उत्साहात सुरुवात झाली. घरगुती गणपतीची सकाळी उत्साहात प्राणप्रतिष्ठा झाली. श्री कसबा, श्री तांबडी जोगेश्वरी, श्री गुरुजी तालीम, श्री तुळशीबाग, श्री केसरीवाडा या मानाच्या गणपतीसह अखिल मंडई मंडळाचा शारदा गजानन, श्रीमंत दगडूशेठ आणि श्रीमंत भाऊसाहेब रंगारी गणपती; तसेच शेकडो सार्वजनिक मंडळांच्या गणपतीचे जल्लोषात आगमन झाले. गणपतीच्या स्वागताच्या पारंपरिक मिरवणुकीने मध्यवर्ती पेठा गणेशमय झाल्या होत्या. मिरवणूक मार्गावर आकर्षक रांगोळ्या साकारण्यात आल्या होत्या. स्वागत कमानी लक्ष वेधून घेत होत्या. गणेशभक्तांकडून चौकाचौकांत मिरवणूक रथावर फुलांची उधळण होत होती.
सायंकाळी अनेकांची पावले मानाच्या गणपतींच्या दर्शनासाठी वळली. त्यामुळे मध्यवर्ती पेठांमध्ये सायंकाळनंतर गर्दी झाली होती. उपनगरातील मंडळाच्या मिरवणुका रात्रीपर्यंत सुरू होत्या. दरम्यान, दीड दिवसाच्या गणपतीचे आज, मंगळवारी विसर्जन होणार आहे.
दरम्यान, यंदाचा गणेशोत्सव बारा दिवसांचा आहे. गणपतीच्या आगमनानंतर आज, मंगळवारी ऋषीपंचमी साजरी होणार आहे. येत्या, गुरुवारी गौरींचे आगमन होणार आहे. शुक्रवारी गौरीपूजन असून, शनिवारी गौरींचे विसर्जन होईल. गणपतीच्या आगमनानंतर आता गौरींच्या आगमनाचे वेध लागले आहेत.