होळीच्या दिवशी शहरात मोठ्या प्रमाणावर वाहतूक नियमांचे उल्लंघन होत असल्याचे यापूर्वी दिसले आहे. त्यामुळे होळी आणि धूलिवंदन सण आनंदात; पण सुरक्षित वातावरणात साजरा व्हावा, यासाठी पुणे शहर वाहतूक पोलिस शाखेकडून विशेष मोहीम राबवण्यात आली. या मोहिमेअंतर्गत ८,५५२ वाहनांची तपासणी करून मद्यपान करून वाहन चालविणाऱ्या ४०२ वाहनचालकांवर ‘ड्रंक अँड ड्राइव्ह’ची कारवाई करण्यात आली.

वाहतूक नियमांचे उल्लंघन करणाऱ्या अनेक वाहनचालकांवर मोठ्या प्रमाणावर दंडात्मक कारवाई करण्यात आली आहे. पोलिस आयुक्त अमितेशकुमार, सहपोलिस आयुक्त रंजनकुमार शर्मा आणि अतिरिक्त पोलिस आयुक्त मनोज पाटील यांच्या मार्गदर्शनाखाली १४ मार्चला शहरात ९० ठिकाणी नाकाबंदी केली होती. वाहतूक शाखेच्या सर्व विभागांनी; तसेच

ठळक मुद्दे
■ पोलिसांनी गेल्या काही आठवड्यांपासून शहरात कडक वाहतूक नियम अंमलबजावणीसाठी विशेष मोहीम सुरू केली. या अंतर्गत वेगवेगळ्या ठिकाणी नाकाबंदी केली जात आहे.
■ फेब्रुवारी महिन्यातही नाकाबंदी लावून ४,५००हून अधिक वाहने तपासली. त्यात २००हून अधिक मद्यधुंद वाहनचालकांवर कारवाई केली.
■ मार्चच्या पहिल्या आठवड्यात ५.३००हून अधिक वाहने तपासली. ड्रंक अँड ड्राइव्ह, ट्रिपल सीट वाहनधारकांवर मोठी कारवाई करण्यात आली.

फॅन्सी नंबर प्लेटवरील कारवाई थंडावली
जुन्या वाहनांना हाय सिक्युरिटी नंबरप्लेट बंधनकारक करण्यात आली आहे. त्यासाठी एप्रिल अखेरपर्यंतची मुदत दिली आहे. मात्र, त्यास मुदतवाढ दिली जाण्याची दाट शक्यता आहे. अद्याप अनेक वाहनांना ‘फॅन्सी’ नंबरप्लेट लावल्या जात असल्याचे दिसते. या वाहनांवर मात्र कारवाई थंडावल्याचे चित्र आहे.

सणांचा आनंद घेताना स्वतःच्या सुरक्षेकडे लक्ष देणे गरजेचे आहे. वाहतूक नियमांचे पालन करा, मद्यप्राशन करून वाहन चालवू नका आणि स्वतःबरोबर इतरांचेही जीव धोक्यात घालू नका. – अमोल झेंडे, उपायुक्त, वाहतूक पोलिस शाखा

जप्तीचे वाहन सोडविण्याची प्रक्रिया
■ वाहन जप्तीनंतर संबंधितावर खटला दाखल केला जातो.
■ संबंधित वाहनावरील प्रलंबित दंडाचा संपूर्ण अहवाल न्यायालयाला सादर केला जातो.
■ वाहनधारकास न्यायालयात तारखेला हजर राहावे लागते.
■ न्यायालयाच्या आदेशानुसार दंड भरून जप्त वाहन सोडवता येते.
■ दोन प्रकरणांत वाहनधारकास पाच दिवसांपर्यंतची न्यायालयीन कोठडीची शिक्षा सुनावली आहे.

१४ मार्चला केलेल्या कारवाईचा आढावा
ड्रंक अँड ड्राइव्ह ४०२
ट्रिपल सीट ९२१
राँग साइड ड्रायव्हिंग ८५२
इतर वाहतूक नियमभंग ३,९४३
एकूण केसेस ६,११८
वसूल केलेला एकूण दंड ५०,९४,०००