शिंदे-अजितदादांना नाना पटोले यांची ऑफर, संजय राऊतांचा दावा

उपमुख्यमंत्री एकनाथ शिंदे आणि अजित पवार यांना काँग्रेसच्या पाठिंब्यावर सरकार स्थापण्याची ऑफर काँग्रेस नेते नाना पटोले यांनी दिल्याच्या पार्श्वभूमीवर, राज्यात जोरदार चर्चा सुरू आहे. त्याबाबत पत्रकार परिषदेत बोलताना राऊत यांनी हा टोला मारला.

टोले यांनी लवकर भांडे वाजवले, त्यांनी थोडे थांबायला हवे होते – संजय राऊत

‘नाना पटोले हे आमचे सहकारी आहेत. राजकारणात काहीही अशक्य नसते. मविआ सरकार येईल, असे कोणाला वाटले होते का? त्यांनी कुणाला ऑफर दिली आहे, कुणी मान्य केली आहे का, हे त्यांच्याशी चर्चा करून बघू. राजकारणात रुसवे-फुगवे, आदळआपट सुरू आहे; पण पटोले यांनी लवकर भांडे वाजवले, त्यांनी थोडे थांबायला हवे होते,’ असे राऊत म्हणाले.

पृथ्वीराज चव्हाण यांची प्रतिक्रिया

‘एकनाथ शिंदे मागे काँग्रेसकडे चालले होते. पृथ्वीराज चव्हाण यांना विचारा,’ असेही राऊत म्हणाले. याबाबत पृथ्वीराज चव्हाण यांनी प्रतिक्रिया देत सांगितलं की मला यासंदर्भात काहीही माहिती नाही.

नरेश म्हस्के यांची टीका

एकनाथ शिंदे काँग्रेसमध्ये जाण्याच्या तयारीत असल्याच्या संजय राऊत यांच्या दाव्यावर शिवसेनेचे खासदार नरेश म्हस्के यांनी टीका केली. ‘एकनाथ शिंदे काँग्रेसमध्ये जाणार हे तुम्हाला माहिती होते, तर तुम्ही त्यांना नेते का बनवले? तुम्ही त्यांना नगरविकास मंत्री का बनवले, याचे उत्तरदेखील त्यांनी द्यायला पाहिजे,’ असे ते म्हणाले.

वडेट्टीवारांची प्रतिक्रिया

संजय राऊत कोणत्या आधारे हा दावा करत आहेत याबद्दल मला माहिती नाही. मी स्पष्पपणे सांगतो की, याबद्दल माझ्याकडे कोणतीही माहिती नाही. राज्यातील प्रत्येक घडामोडींवर राजकारण्यांचे लक्ष असतं. कधी अशा काही गोष्टी झाल्या, असं मला तरी वाटत नाही. मात्र, भविष्यात काहीही घडू शकते. राजकारणात कोणी कोणाचे मित्र आणि शत्रू नसतात. माणसाचा स्वाभिमान दुखावला की, तो कशाचीही पर्वा करत नाही, असं काँग्रेसचे नेते विजय वडेट्टीवार म्हणाले