भुईंज पोलिस ठाण्याचे सहाय्यक पोलिस निरीक्षक रमेश गर्जे यांनी दिलेली माहिती अशी की, सलमा इरफान मोमीन (वय ४० रा. सांगली), नहीदा समीर शेख (वय ३९, रा. शनिवार पेठ सातारा), बशीर महम्मद पठाण (वय ७३, रा. शनिवार पेठ सातारा), सलमान रफिक पठाण (वय २७, रा. जवळवाडी, ता. मेढा) असे चौघेजण येणाऱ्या ईदच्या सणासाठी लागणारे साहित्य खरेदी करण्यासाठी सातारहून इनोव्हा कार (क्रमांक एमएच ११ बीके-१५६७) मधून सातारा-पुणे महामार्गावरून पुण्याच्या दिशेने रविवार सकाळी ९ वाजण्याच्या सुमारास जात असताना त्यांची कार भरघाव वेगात पाचवड (ता. वाई) गावच्या हद्दीत आली. त्यावेळी महामार्गावर त्यांच्या समोर नादुरुस्त एक कंटेनर (क्रमांक एमएच १४ जेएल २५७३ ) बंद अवस्थेत उभा होता, तो कारचालकाने पाहताच त्याचा गाडीवरील ताबा सुटला. भरधाव वेगात कारने पाठीमागून उभ्या कंटेनरला जोराची धडक दिल्याने कारमधील सर्वजण बाहेर फेकले गेले. ही धडक एवढी भीषण होती‌, त्यात दोन महिलांचा जागीच मृत्यू झाला, तर चालकासह एक जण गंभीर जखमी झाले आहेत.

हा अपघात घडला त्यावेळी वाईचे डीवायएसपी बाळासाहेब भालचीम हे सातारहून परेड उरकून वाईच्या दिशेने जात होते. या भीषण अपघातातील मृत व जखमी महामार्गावर रक्ताच्या थारोळ्यात पडलेले पहाताच त्यांनी गाडी थांबवली. अपघात स्थळाची पाहणी करून भुईंज पोलिस ठाण्याचे सहाय्यक पोलीस निरीक्षक रमेश गर्जे यांना अपघाताची माहिती दिली.

या अपघाताची माहिती सपोनि रमेश गर्जे यांना समजताच पीएसआय शिंदे, हवालदार शिवाजी तोडरमल, दगडे, भोसले या सहकार्याना सोबत घेऊन घटनास्थळी दाखल झाले. त्यांनी तात्काळ रुग्णवाहिका बोलावून जखमींना उपचारासाठी सातारा येथील शासकीय रुग्णालयात पाठवले. अपघाताचा तपास सपोनी रमेश गर्जे यांच्या मार्गदर्शनाखाली पोलिस उपनिरीक्षक शिंदे हे करीत आहेत.

रमजानचे रोजा आणि यातील काही जखमींचे हातात असलेली जपमाळ आणि नातेवाईकांचा आक्रोश खूप काही सांगून गेला. भुईंजचे ग्रामीण रुग्णालय सुरू असते, तर जखमींचे प्राण वाचले असते, अशी चर्चा पाचवड ग्रामस्थ करीत होते.