पोलिसांच्या माहितीनुसार, तीन दिवसांपूर्वी श्रीकांत डोईफोडे याने जिल्हा परिषदेच्या समाजकल्याण विभागाच्या नावाने बनावट जाहिरात प्रसिद्ध केली होती. जाहिरातीतील २० झोपडपट्ट्यांच्या साफसफाईचे कंत्राट देण्यात येणार असल्याचे सांगण्यात आले. विशेष म्हणजे, या जाहिरातीसाठी समाजकल्याण विभागाचे बनावट लेटरहेड वापरण्यात आले होते. त्यामुळे अनेक कंपन्यांनी या कंत्राटाबाबत चौकशी केली होती. या फसवणुकीत एका कंपनीला कंत्राट देण्यात आले आणि २१ मार्चपासून काम सुरू करण्याच्या सूचना देण्यात आल्या. मात्र, खातरजमा करण्यासाठी संबंधित कंपनीने समाजकल्याण विभागाशी संपर्क साधला. आणि लक्षात आले की, अशी कोणतीही निविदा प्रक्रिया झालेली नाही. त्यामुळे हे संपूर्ण फसवणूकीचे प्रकरण उघडकीस आले.

संशयित आरोपी श्रीकांत डोईफोडे याने सरकारी विभागाच्या अधिकृत कागदपत्रांचा गैरवापर करत बनावट निविदा प्रसिद्ध केली होती. यामुळे अनेक व्यावसायिक आणि ठेकेदारांची फसवणूक होण्याची शक्यता होती. सदर पोलीस ठाण्यात त्याच्याविरुद्ध गुन्हा दाखल करण्यात आला आहे. पोलीस या प्रकरणाचा अधिक तपास करत आहेत. या फसवणुकीमागे आणखी काही जणांचा सहभाग आहे का, याचा शोध घेण्यासाठी पोलीस तपास करत आहेत. तसेच, ही एकट्या श्रीकांत डोईफोडेची योजना होती की, यामागे मोठे नेटवर्क कार्यरत आहे, याबाबत तपास सुरू आहे. सध्या पोलिसांनी काही महत्त्वाची कागदपत्रे जप्त केली असून आरोपीच्या अन्य गुन्ह्यांची चौकशी केली जात आहे. लवकरच या प्रकरणात अधिक माहिती समोर येण्याची शक्यता आहे.