सामनगाव रस्त्यावरील अश्विनी कॉलनीतील रहिवासी विमल भाऊराव शिंदे (वय ४४) यांनी नाशिकरोड पोलिसांत फिर्याद दिली आहे. त्यानुसार गणेश दीपक जाधव, योगेश पवार, दीपक जाधवचे मामा (सर्व रा. सामनगाव रोड) या संशयितांवर गुन्हा नोंद आहे. दरम्यान, शिंदे या सायंकाळी आठ वाजेच्या सुमारास घरी स्वयंपाक करीत असताना गणेश तेथे आला. कुत्रा त्याच्यावर भुंकल्याच्या कारणातून त्याने शिंदे यांच्या भावाच्या मुलास शिवीगाळ केली. हे भांडण मिटविण्यासाठी शिंदे गेल्या असता गणेशने लोखंडी रॉडने डोक्यात हल्ला केला. यासह योगेश व दीपकच्या मामाने लाकडी दांडके उगारून शिंदे व त्यांच्या भावासह मुलाला शिवीगाळ केली. यासह शिंदेंच्या भावाला ‘तू बाहेर ये, तुझा बेत पाहून घेतो’, अशी धमकी दिली. त्यावरून शिंदे यांनी पोलिसांत धाव घेत तक्रार दिली. याप्रकरणी पोलिस पुढील तपास करीत आहेत. दरम्यान, अतिशय किरकोळ कारणांतून शहरात एकमेकांवर हल्ले होत आहेत. त्यावर नियंत्रणासाठी पोलिस प्रयत्न करीत आहेत. परंतु, क्षुल्लक कारणांतून गंभीर प्रकार घडत असल्याने त्याकडे गांभीर्याने पाहण्याची गरज आहे.

गंजमाळ पसिरातील म्हाडा वसाहतीसमोरून जाणाऱ्या मुलाच्या अंगावर कुत्रा भुंकल्याने त्याने दगड फेकून मारल्याच्या रागात दोघांनी मुलाला मारहाण केली. रात्री एक वाजेच्या सुमारास हा प्रकार घडला. एका सोळा वर्षीय मुलाने त्यासंदर्भात भद्रकाली पोलिसांत फिर्याद दिली आहे. त्यानुसार ईश्वर घोडे व परश्या (संपूर्ण नाव माहिती नाही) या संशयितांविरुद्ध दुखापतीचा गुन्हा नोंद आहे. मुलाने कुत्र्याच्या दिशेने दगड फेकल्याने दोन्ही संशयितांनी त्याला अडवून चापटीने व लाथाबुक्क्यांनी मारहाण करून शिवीगाळ करीत थेट चाकूने वार केले आहेत. या हल्ल्यात मुलाच्या पाठीवर गंभीर दुखापत झाली आहे. सामनगाव रस्त्यासह गंजमाळ परिसरात घडलेल्या दोन्ही घटनांवरून नागरिकांना भूतदया आणि माणुसकीचा विसर पडत असल्याचे सिद्ध होत आहे.