महापालिकेने सिंहस्थाचा आराखडा हा आता सात हजार ७६७ कोटींपर्यंत आणला आहे. दुसरीकडे सार्वजनिक बांधकाम, पोलिस विभाग, जिल्हा परिषद, जलसंपदा, नाशिक विकास प्राधिकरणासह विविध विभागांनीही साडेसात हजार कोटी, असा सर्व विभागांचा आराखडा हा पंधरा हजार कोटींपर्यंत पोहचला आहे. प्रयागराजच्या धर्तीवर नाशिकचा कुंभमेळा व्हावा यासाठीचे नियोजन करण्याचे निर्देश मुख्यमंत्री देवेंद्र फडणवीस यांनी यंत्रणांना दिले असून, त्या संदर्भात विकासकामांना चालना देण्याच्या सूचना केल्या आहेत. त्यानुसार विभागीय आयुक्त डॉ. गेडाम यांनी विविध यंत्रणांमध्ये समन्वय साधून सिंहस्थाची तयारी सुरू केली आहे. सन २००३ मध्ये नाशिकमधील सिंहस्थात झालेली चेंगराचेंगरी आणि प्रयागराजमध्ये झालेल्या चेंगराचेंगरीच्या पार्श्वभूमीवर नाशिकच्या कुंभमेळा दुर्घटनामुक्त व्हावा यासाठी प्रयत्न सुरू आहेत. त्यासाठी गेल्या आठवड्यात सिंहस्थाशी संबंधित अधिकाऱ्यांनी त्र्यंबकेश्वरचा पाहणी दौरा केला. त्यानंतर आज, गुरुवार आणि शुक्रवार असे दोन दिवस नाशिकमधील सिंहस्थाशी संबंधित ठिकाणीची पाहणी केली जाणार आहे. नवीन आलेल्या अधिकाऱ्यांसह जवळपास ५० अधिकाऱ्यांना नाशिक दर्शन घडवले जाणार आहे.

…या ठिकाणांची होणार
पाहणी सिंहस्थ आराखडा तयार करण्याचे काम सुरू असले तरी, वरिष्ठ अधिकाऱ्यांनी या आराखड्याचा कागदावरच अभ्यास केला आहे. त्यामुळे या अधिकाऱ्यांना प्रत्यक्ष जागेवर जाऊन झालेली कामे आणि आवश्यक कामांचे दर्शन घडवले जाणार आहे. तसेच साधूंच्या शाहीस्नानाचा मार्ग, या मार्गावरील अतिक्रमणे, रामकुं रामकुंड, काळाराम मंदीर परिसर, पंचवटीतील रामकाल पथ, तपोवनातील आखाडे, साधुग्रामची जागा, नदीकाठावरील घाट, सिंहस्थासाठीचे पार्किंग, रिंगरोड, नाशिकमध्ये प्रवेश करणारे प्रमुख रस्ते यांसह विविध ठिकाणांना भेटी देऊन अधिकारी त्याचा अभ्यास करणार आहेत.