ताज ग्रुपकडून मुंबईतील वांद्रे येथे एका हॉटेलची उभारणी होत आहे. या वेळी आयोजित कार्यक्रमात फडणवीस बोलत होते. ‘वांद्रे परिसरात इतक्या सुंदर हॉटेलची उभारणी करीत असल्याबद्दल मी इंडियन हॉटेलचे आभार मानतो. हे हॉटेल रतन टाटा यांच्या अत्यंत जवळचे होते. हॉटेल उभारणीत काही अडचणी येत असल्याचे त्यांनी एकदा मला सांगितले होते. २१व्या शतकातील वास्तूचा उत्तम नमुना म्हणून हे हॉटेल समोर येईल,’ असा विश्वास फडणवीस यांनी व्यक्त केला. ‘ताज ग्रुपने हॉस्पिटॅलिटीची व्याख्या बदलली आहे. अनेक देशांत ताज ग्रुपचे स्थान आहे. त्यामुळे परदेशातही आपण मुंबई किंवा भारतातच आहोत, असे वाटते,’ असे ते म्हणाले.
पर्याय मिळेपर्यंत ‘पीओपी’च्याच मूर्ती! गणेशमूर्ती विसर्जन बंदीच्या पार्श्वभूमीवर मूर्तिकारांची भूमिका
‘रतन टाटा यांच्या जाण्याआधी हे हॉटेल उभे राहिले असते किंवा भूमिपूजन झाले असते, तर त्यांना आनंद झाला असता. कदाचित आम्हीही त्यातील समस्या सोडवण्यात कमी पडलो असू, मात्र आता प्रकल्प उभारणीसंदर्भात काही अडचणी आल्या तर पाठीशी उभे राहू. मुंबईला आणखी अशा हॉटेलची अपेक्षा आहे. तुम्ही अजून काही हॉटेलची उभारणी करावी,’ असे आवाहन त्यांनी या वेळी केले. ‘ताज ग्रुपचे महाराष्ट्रात चांगले प्रस्थ आहे. पण ताज ग्रुपचे नागपुरात हॉटेल नाही. ताज ग्रुपने नागपुरात हॉटेल उभारले पाहिजे. तुम्ही आजच याबाबतची घोषणा करावी, अशी माझी इच्छा आहे,’ असे फडणवीस म्हणाले. त्यानंतर लगेचच काही मिनिटांत ताज ग्रुपने नागपुरात ताज हॉटेल उभारण्याची घोषणा केली.