हे सगळं धक्कादायक प्रकरण ज्या इंग्रजी माध्यमाच्या शाळेत घडली ती शाळा सीवूड्स भागात आहे. या शाळेने गत २८ जानेवारी रोजी ज्युनिअर केजीमध्ये शिकणाऱ्या एका ५ वर्षीय मुलाला नियमीत वर्गात न बसवता, त्याला एकट्याला डांबून ठेवले. १००० रुपयांसाठी त्याला इतकी वाईट वागणूक देण्यात आली.

शालेय फी न भरल्याच्या समजातून सीवूड्समधील एका इंग्रजी माध्यमाच्या खासगी शाळेच्या व्यवस्थापनाने एका पाच वर्षीय विद्यार्थ्याला वर्गात न बसवता त्याला एकट्याला अन्न पाण्याशिवाय डे-केअरमध्ये बसवून ठेवल्याचा धक्कादायक प्रकार उडकीस आला आहे. विशेष म्हणजे या मुलाच्या पालकांनी शाळेची ४२ हजार रुपयांची संपूर्ण फी भरलेली असताना, शाळेने हा प्रताप केल्याचा आरोप पालकांनी पोलिसांना दिलेल्या तक्रारीत केला आहे.

जुलै २०२४ मध्ये शाळेची ४२ हजार रुपयांची संपूर्ण फी भरली होती. तरी देखील त्यांच्या मुलाला शाळेकडून क्रूर वागणूक दिल्याबाबत पालकांनी मुख्याध्यापिकेकडे जाब विचारला असता, त्यांच्या मुलाची १ हजार रुपयांची फी प्रलंबित असल्याचे त्यांना सांगण्यात आले. त्यामुळे ती रक्कमसुद्धा पालकांनी त्यावेळी लगेचच भरून टाकली. दरम्यान, जे पालक मुलांची फी भरत नाहीत, अशा मुलांना क्लासमध्ये न बसवता त्या मुलांना डे-केअरमध्ये बसवण्याचा शाळा व्यवस्थापनाने निर्णय घेतला असल्याचे तक्रारदारांना सांगण्यात आले आहे.

त्या मुलाला डे-केअरमध्ये बसवून ठेवले होते. या मुलाचे वडील त्याला घेण्यासाठी शाळेत गेले, मात्र त्यांच्या मुलाला सोडण्यात आले नाही. त्यामुळे मुलाच्या वडिलांनी वर्ग शिक्षिकेकडे त्याबाबत विचारणा केली असता, त्यांच्या मुलाची फी बाकी असल्याने त्यांच्या मुलाला मुख्याध्यापिका घेऊन गेल्याचे सांगण्यात आले.

आता या सगळ्या धक्कादायक प्रकरणानंतर पोलीस प्रशासन व नवी मुंबई शिक्षण विभागाचे प्रशासन या संबंधित इंग्रजी शाळेच्या व्यवस्थापनाविरोधात कोणती कारवाई करते हे पाहणे सगळ्यात महत्त्वाचं ठरणार आहे. फी न भरल्याच्या कारणाखाली लहान विद्यार्थ्याला अपमानास्पद वागणूक देऊन त्याचे हाल करण्याचा प्रयत्न करणे या सगळ्या प्रकारामुळे पालक वर्गामध्ये नाराजी व्यक्त केली जात असून संबंधित शिक्षिका व शालेय व्यवस्थापन यांच्या विरोधात कठोर कारवाई करावी अशी मागणी होऊ लागली आहे.