Three Died In Beed Accident: बीडमध्ये दोन कार एकमेकांवर धडकल्या असून भीषण अपघात झाला. या अपघातात तिघांचा मृत्यू झाला आहे. यामध्ये दिंद्रुडचे सरपंच यांच्या मोठ्या भावाचाही समवेश आहे.
दोन कारची समोरासमोर धडक अन्…
अंबाजोगाई-केज मार्गावरील चंदनसावरगाव नजीक शुक्रवारी (३१ जानेवारी) रात्री १०.४५ च्या सुमारास दोन कारची समोरासमोर धडक होऊन भीषण अपघात झाला. या भीषण अपघातात तिघांचा मृत्यू झाला आहे. तर, एक जण गंभीर जखमी असल्याची माहिती आहे. मृतांमध्ये अमित दिलीपराव कोमटवार (वय ३५, रा. दिंद्रुड, माजलगाव) यांचा समावेश आहे.
अपघातातील कार क्रमांक (एम एच-२३/ई ६८५२) आणि (एम एच-१२/एम डब्ल्यू-३५६३) या दोन वाहनांची समोरासमोर धडक झाली. वाहन चालकांचे वाहनावरील नियंत्रण सुटल्याने हा भीषण अपघात घडला असल्याची माहिती सूत्रांनी दिली आहे. या अपघातात अमित कोमटवार आणि बीड येथील दोघांचा मृत्यू झाला आहे. तर अन्य एक जण गंभीर जखमी झाल्याची माहिती आहे. अमित कोमटवार हे दिंद्रुडचे सरपंच अजय कोमटवार यांचे ज्येष्ठ बंधू होते.
शुक्रवारी रात्रीच्या सुमारास अचानक मोठा आवाज झाला. आवाज ऐकून परिसरातील नागरिकांनी घटनास्थळी धाव घेतली. तेव्हा तिथे ही दोन वाहनं एकमेकांना धडकलेली दिसली. ही धडक इतरी जबर होती की दोन्ही गाड्यांचा अक्षरश: चक्काचूर झाला आहे. अपघाताचे फोटो पाहून हा अपघात किती भीषण होता हे दिसून येते.
युसुफवडगाव पोलीस ठाण्याचे प्रमुख सहाय्यक पोलीस निरीक्षक मच्छिंद्रनाथ शेंडगे यांना माहिती मिळताच, त्यांच्या मार्गदर्शनाखाली बीट अंमलदार शेंडगे, हेडकॉन्स्टेबल पठाण, हेडकॉन्स्टेबल वारे घटनास्थळी पोहोचले. पोलिसांनी मृतदेह ताब्यात घेऊन जखमींना रुग्णालयात दाखल केले. जखमी व्यक्तीला पुढील उपचारासाठी लातूर येथे हलवण्यात आले असल्याचे समजते. तर, याघटनेत तिघांनी आपला जीव गमावला आहे. त्यामुळे परिसरातील नागरिकांमधून एकच हळहळ व्यक्त होत आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा