विजय वडेट्टीवार हे स्वत:चा प्रस्ताव एकनाथ शिंदेंकडे घेऊन गेले होते. कोणामार्फत कोण गेला, कोणाची चर्चा झाली, या सगळ्याची माहिती माझ्याकडे आहे. मी राजकारणाचे एथिक्य पाळतो, अशा शब्दांत सामंत यांनी वडेट्टीवार यांच्यावर जोरदार पलटवार केला आहे. शिंदे गटातून लवकरच नव्या नेत्याचा उदय होईल असं विधान करत वडेट्टीवार यांनी एकच खळबळ उडवून दिली होती. त्यांना सामंत यांनी प्रत्युत्तर दिलं आहे.

विजय वडेट्टीवार यांनी स्वत:चा प्रस्ताव एकनाथ शिंदेंकडे आणला होता. त्यात उदय सामंतआडकाठी करत असल्याचं त्यांना वाटत असावं. त्यामुळे त्यांच्याकडून माझी बदनामी सुरु आहे. पण कोणामार्फत कोण गेलं, कोणाचा फोन गेला होता. याबद्दल माझ्याकडे जितकी माहिती आहे, तितकी माहिती अन्य कोणाकडे नसेल. पण मी राजकारणात मूल्यं, नैतिकता पाळतो. काही बंधनं पाळतो. त्यामुळे झालेल्या गोष्टी मी सोडून देतो, अशा शब्दांत सामंत यांनी वडेट्टीवारांचा समाचार घेतला.

‘ज्याचं हसू झालंय, त्यांनी स्वत:चा उदय करुन घेऊ नये. त्यामुळे त्यांचं राजकारण त्यांच्यापुरतं आणि राऊत साहेबांचं राजकारण त्यांच्यापुरतं, तर माझं राजकारण माझ्यापुरतं,’ असं सामंत यांनी म्हटलं. वडेट्टीवार यांच्यासह संजय राऊत यांनी सामंत यांच्या मागे शिंदेसेनेचे २० आमदार असल्याचा दावा करत खळबळ उडवून दिली होती.