महाराष्ट्रात राहताना अमराठी माणसांना, दैन्ंदिन व्यवहारासोबतच कायदेशीर व्यवहारांकरिता मराठी भाषा अवगत असणे फार आवश्यक आहे. अन्यथा त्यांना बऱ्याच अडचणींना सामोरे जावे लागू शकते. यात रोजच्या सामान्य कामकाजासहीत अनेक कायदेशीर बाबींचा समावेश होतो. एखाद्याच्या अडचणीचा फायदा घेणे हे, समाजातील भामट्यांना चांगले जमते. अशीच एक घटना पुण्यात घडली आहे. एका तरुणीला मराठी भाषा नीट येत नसल्यामुळे, तिच्या या अडचणीचा गैरफायदा घेत एका भामट्याने तिला कोट्यवधींना गंडा घातला आहे.

याबाबत घोरपडी गावातील तरुणीने मुंढवा पोलिस ठाण्यात फिर्याद दिली आहे. त्यानुसार पोलिसांनी तुषार हिम्मत कवडे (रा. श्रीनाथनगर घोरपडी), पॉल पीटर फ्लेरो (रा. घोरपडी) आणि सुरेश त्रिंबक पाळवदे (रा. थिटे वस्ती, खराडी) यांच्याविरुद्ध गुन्हा दाखल केला आहे. हा प्रकार २४ एप्रिल ते ऑगस्ट २०२४ दरम्यान घडला.

पोलिसांनी दिलेल्या माहितीनुसार, आरोपींनी फिर्यादीच्या मिळकतीचा व्यवहार करून देतो, असे सांगून विश्वास संपादन केला. फिर्यादी तरुणीचा मराठी भाषेविषयी असलेल्या अज्ञानाचा फायदा घेत तिची दिशाभूल करून पत्रव्यवहार करण्यासाठी संमतिपत्र घेतो, असे सांगून कुलमुखत्यारपत्र घेतले. तरुणीच्या मालकीची घोरपडीतील अंदाजे एक कोटी रुपयांपेक्षा जास्त किंमत असलेल्या मिळकतीचा बनावट दस्त बनविला. त्यावर फिर्यादीच्या कुलमुखत्यारपत्रावरील छायाचित्रावरून दुसरे रंगीत छायाचित्र काढले. बनावट सही व अंगठा करून या मिळकतीचा व्यवहार केला. त्याचा कोणताही लाभ फिर्यादीला न देता फसवणूक केली. वरिष्ठ पोलिस निरीक्षक निळकंठ जगताप पुढील तपास करीत आहेत.