दिवसागणिक रुग्णसंख्या वाढू लागल्याने आरोग्य यंत्रणा हादरली आहे. ही सर्व गावे खारपाणपट्ट्यातील असल्याने या गावांमध्ये ‘नायट्रेट’, ‘डीटीएस’चे प्रमाण अधिक आहे. पाण्यामुळे हे घडत असल्याचाही धोका व्यक्त झाल्याने पाण्याचे नमुने ‘हेवी मेटल्स’च्या तपासणीसाठी नागपूरला पाठविण्यात आले आहेत. पाच रुग्णांच्या नमुन्यांची ‘स्कीन बायोप्सी’ही केली जाणार आहे. या दोन्हींचे अहवाल आठ-दहा दिवसांनी येणार असल्याने केसगळतीच्या निदानासाठी आणखी काही दिवस गावकऱ्यांना प्रतीक्षा करावी लागणार आहे.

शेगाव तालुक्यातील बोंडगाव, कालवड, कठोरा, भोनगाव, हिंगणा, घुई या सहा गावांमध्ये आठ वर्षांच्या लहान मुला-मुलींपासून महिला व पुरुष अशा ५२ जणांना केसगळतीची समस्या असल्याचे दिसले. ७० ते ८० टक्के केस आपसूकच गळाल्याने लोकांनी टक्कल केले. आरोग्य यंत्रणेचे ५० अधिकारी, डॉक्टर व कर्मचारी केसगळती झालेल्या गावांमध्ये ७ जानेवारी रोजी पोहोचले. त्वचा रोगतज्ज्ञ डॉ. बालाजी आदरट यांनी रुग्णांची तपासणी करून ‘फंगल इन्फेक्शन’चा प्राथमिक अंदाज वर्तविला. आरोग्य पथकांकडून घरोघरी जाऊन सर्वेक्षण केले जात आहे. हे सारे घडत असतानाच गुरुवारी तरोडा कसबा, पहुरजिरा, निंबी, माटरगाव व मच्छिंद्रखेड या गावांमध्येही केसगळतीचे रुग्ण आढळले. या गावांतही आरोग्य विभागाने नमुने घेऊन तपासणीसाठी पाठविले आहेत.
लग्नाच्या १० वर्षांनी लेक जन्मला, पण काळानेच हिरावला, ट्रकच्या धडकेत मायलेकाचा मृत्यू, कल्याण हादरलं
टक्कल केल्यानंतर केस
सुमारे ७० ते ८० टक्के केसगळती झाल्यानंतर लोक टक्कल करून घेत आहेत. हे केल्यानंतर त्यांच्या डोक्यात परत केस उगवत असल्याची माहिती सरपंच रामा थारकर यांनी दिली.

पिढ्यानपिढ्या आम्ही हेच पाणी पितोय’
‘नायट्रेट’, ‘टीडीएस’चे मोठे प्रमाण आढळून आले. पाणी पिण्यास आणि वापरण्यास अयोग्य असल्याचा अहवाल प्राप्त झाला आहे. मात्र आम्ही पिढ्यान्‌पिढ्या हेच पाणी पित आलो आहे. किडनी रोग वगळता आजपर्यंत आम्हाला कोणतीही समस्या उद्भवली नाही, असे खातखेड-बोंडगावचे सरपंच रामा थारकर यांनी सांगितले.
‘राष्ट्रवादी-शप’ला गळती? शरद पवारांच्या पक्षातील खासदार, आमदार फुटण्याच्या चर्चेने खळबळ
महिलांमध्ये धास्ती
महिलांसाठी केस हे त्यांच्या सौंदर्याचा एक भाग आहे. या महिलांचेही केस गळू लागल्याने त्यांच्यात भीती वाढली आहे. अनेक महिला धास्तीपोटी समोरही येत नसल्याचे दिसून येत आहे. या महिलांवर उपचारासाठी समुपदेशन करण्याची गरज आहे. ग्रामपंचायतींमार्फत या महिलाचे समुपदेशन केले जात आहे. घरोघरी प्रत्यक्ष जावून, सोशल मीडियाच्या माध्यमातूनही जनजागृती केली जात आहे.

शास्त्रज्ञांसह तज्ज्ञ डॉक्टरांचे पथक येणार
अकोला येथील शासकीय वैद्यकीय महाविद्यालयाचे सुक्ष्मजीव शास्त्रज्ञ, फिजिशियन, बालरोगतज्ज्ञ, त्वचारोगतज्ज्ञ, एमडी, पीएसएम या विशेष तज्ज्ञांच्या पथकांमार्फत सर्वेक्षण करून वस्तुनिष्ठ अहवाल सादर करण्याबाबत आरोग्य सेवा संचालनालयाच्या संचालकांनी अकोला मंडळाच्या आरोग्य उपसंचालकांना निर्देश दिले आहेत. ‘फंगल इन्फेक्शन’चा प्राथमिक अंदाज वगळता अद्याप डोक्यावरील केसगळती का होते, याचे स्पष्ट निदान झाले नाही. मात्र, वैद्यकीय महाविद्यालयाचे पथक येणार असल्याने काही तरी दिलासा मिळेल, अशी अपेक्षा गावकरी व्यक्त करीत आहेत
एक निवडणूकवरून वादंग; ‘जेपीसी’च्या पहिल्या बैठकीत सत्ताधारी-विरोधी खासदारांचे दावे-प्रतिदावे
नातेवाइकांनी फिरविली पाठ
केसगळतीचा संसर्ग आपल्यालाही होईल या भीतीने अकराही गावांकडे पाहुणे आणि नातेवाइकांनी पाठ फिरविली आहे. कामानिमित्त येणारेही गावात पाय ठेवण्यास धजावत नाहीत. त्वचा रोगतज्ज्ञांनी केलेल्या तपासणीत ‘फंगल इन्फेक्शन’मुळे केस गळत असल्याचा प्राथमिक वर्तविला आहे. तरीही स्पष्ट निदान झाल्याशिवाय नागरिकांमधील भीती कायम राहणार असल्याची चिन्हे आहेत

पहिली केस गळती इलामे कुटुंबात
आठ, दहा दिवसांपूर्वी बोंडगावचे रहिवासी विलास इलामे यांच्या कुटुंबातील मुलीसह तीन महिलांना केसगळतीची समस्या सुरू झाली. अशी तक्रार करणारे ते पहिले कुटुंब होते. यासंदर्भात संवाद साधला असता इलामे म्हणाले, ‘काय प्रकार आहे म्हणून अकोला येथे डॉक्टरांकडे गेलो असता त्यांनी शॅम्पूमुळे हा प्रकार घडत असल्याचे सांगितले. मात्र, जे लोक शॅम्पू लावत नाहीत, त्यांचेही केस गळत होते. नंतर आरोग्य पथक आले. त्यांच्याकडे विचारणा केली असता पाण्याच्या नमुन्याच्या अद्याप अहवाल आला नसल्याचे सांगितले. पण, याचे नेमके कारण डॉक्टर सांगू शकले नाही,’ असेह इलामे यांनी सांगितले.
Suresh Dhas: बॅंका बुडवण्यात कराडचा हात; आमदार सुरेश धस यांची अजित पवारांकडे तक्रार
केसगळतीची परिस्थिती आटोक्यात येईपर्यंत जिल्हास्तरीय, तालुकास्तरीय अधिकारी व कर्मचारी या कार्यक्षेत्रात निरंतर कार्यरत राहणार आहे. – डॉ. अमोल गिते, जिल्हा आरोग्य अधिकारी, बुलढाणा

डॉक्टर म्हणाले…
• केसगळतीने घाबरून जाऊ नका.
• पुन्हा डोक्यावर केस उगवतील.
• अहवालानंतर निदानानुसार औषधोपचार केले जातील.
• तोपर्यंत शॅम्पूने केस धुवावेत. स्वच्छता ठेवावी.
• केस कोरडे झाल्याशिवाय डोक्याला कापड बांधू नये.
• पिण्यास व वापरण्यास अयोग्य असलेले पाणी वापरू नये
Nashik Crime News: ‘सीए’लाच केलं डिजिटल अरेस्ट; ४२ लाख रुपये उकळले, पोलिसांनी गोठविले १२ लाख, नेमकं काय घडलं?
गावनिहाय रुग्णसंख्या
■ बोंडगाव : १९
∎ कालवड : १५
■ कठोरा : ०८
■ भोनगाव : ०४
■ मच्छिंद्रखेड : ०५
■ हिंगणा वैजिनाथ : ०६
■ घुई : ०८
■ तरोडा कसबा : १०
■ माटरगाव : ०८
■ पहुरजिरा : १२ निंबी : ०५