स्थानिक स्वराज्य संस्थांच्या निवडणुकीत आता युती-आघाडी नको. स्वबळावर या निवडणुका लढवा आणि जिंका अशी गळ छत्रपती संभाजीनगरच्या पदाधिकारी व कार्यकर्त्यांनी पक्षप्रमुख उद्धव ठाकरे यांना घातली. हिंदूत्वाची भूमिका रोखठोकपणे मांडा असेही आर्जव पदाधिकाऱ्यांनी केले.

शिवसेना उद्धव बाळासाहेब ठाकरे पक्षाचे छत्रपती संभाजीनगरचे काही माजी नगरसेवक, पदाधिकारी उप मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याची चर्चा सुरू झाल्यामुळे गुरुवारी (नऊ जानेवारी) मुंबईत ‘मातोश्री’ निवासस्थानी उद्धव ठाकरे यांच्या प्रमुख उपस्थितीत माजी नगरसेवक, पदाधिकाऱ्यांची बैठक झाली.
Devendra Fadnavis : फडणवीसांनी ठाकरेंचे पाच शिलेदार फोडले, पण भाजप नेत्याचीच नाराजी, पोस्टर लावलं ‘दुश्मनी जमकर करो’
या बैठकीला पक्षाचे सचिव विनायक राऊत, खासदार संजय राऊत यांच्यासह पक्षाचे नेते व छत्रपती संभाजीनगरचे माजी खासदार चंद्रकांत खैरे, विरोधी पक्षनेते अंबादास दानवे यांची देखील विशेष उपस्थिती होती. सुमारे तासभर ही बैठक चालली.

सुत्रांनी दिलेल्या माहितीनुसार या बैठकीत उद्धव ठाकरे यांनी काही प्रमुख पदाधिकाऱ्यांचे म्हणणे ऐकून घेतले. त्यात त्रिंबक तुपे, रेणुकादास (राजु) वैद्य, राजु शिंदे, गोपाळ कुलकर्णी आदींचा समावेश होता. बैठकीला सर्वच माजी नगरसेवक उपस्थित होते.

येत्या काळात स्थानिक स्वराज्य संस्थेच्या निवडणूका होणार आहेत. या निवडणूकीत आपण युती – आघाडी न करता स्वबळावर लढावे आणि जिंकावे अशी गळ पदाधिकाऱ्यांनी पक्षप्रमुखांना घातली. काँग्रेससोबतचा सलोखा तोडा पूर्वी प्रमाणे हिंदुत्वाचा प्रखर पुरस्कार करीत या निवडणुकीला सामोरे जा असे पदाधिकारी म्हणाल्याचे सुत्रांनी सांगितले.

पदाधिकाऱ्यांचे मनोगत ऐकून घेतल्यावर उद्धव ठाकरे यांनीदेखील स्वबळावर लढण्याचे संकेत दिल्याची माहिती सूत्रांनी दिली. आता लढायचे आणि जिंकायचे अशीच भूमिका त्यांनी पदाधिकाऱ्यांसमोर मांडली. चंद्रकांत खैरे आणि अंबादास दानवे यांनाही त्यांनी कानपिचक्या दिल्या. या दोन्हीही नेत्यांनी एकत्र राहावे असे त्यांनी आपल्या मनोगतातून व्यक्त केले.

खैरे-दानवेंचा एकत्र मेळावा

‘मातोश्री’ने डोळे वटारताच शिवसेना उद्धव बाळासाहेब ठाकरे पक्षाचे नेते चंद्रकांत खैरे, अंबादास दानवे यांनी एकत्र येत शनिवारी (११ जानेवारी) पक्षाच्या प्रमुख पदाधिकारी व लोकप्रतिनिधींच्या मेळाव्याचे आयोजन केले आहे. तापडिया नाट्य मंदिरात सकाळी साडेदहाला हा मेळावा होणार आहे.
INDIA Bloc : इंडिया आघाडीचं विसर्जन निश्चित, नेतृत्वाबाबत अस्पष्ट भोवली, दिल्लीत मित्रपक्षांनी काँग्रेसची साथ सोडली
शिवसेना उद्धव बाळासाहेब ठाकरे पक्षाला लोकसभा निवडणुकीत छत्रपती संभाजीनगरमध्ये पुन्हा एकदा पराभवाचे तोंड पाहावे लागले. त्यानंतर झालेल्या विधानसभा निवडणुकीत जिल्ह्यातील नऊ च्या नऊ जागा गमवण्याची नामुष्की या पक्षावर आली. त्यामुळे खैरे-दानवे यांच्यातील वादाची चर्चा अधिक जोर धरू लागली. पाच माजी महापौरांनी उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केला, तर काही पदाधिकारी, माजी नगरसेवकदेखील शिवसेनेत दाखल झाले. आणखीन काही जण शिवसेनेत दाखल होणार असल्याची चर्चा सुरु झाली. त्यामुळे गुरुवारी ‘मातोश्री’वर बैठक झाली. त्यात खैरे-दानवे यांना कानपिचक्या देण्यात आल्या, त्यांच्यावर डोळे वटारण्यात आल्याची माहिती मिळाली आहे.

‘मातोश्री’वरील बैठकीच्या आयोजनानंतर लगेचच खैरे-दानवे यांनी एकत्र येत पदाधिकारी व लोकप्रतिनिधींचा मेळावा शनिवारी (११ जानेवारी) सकाळी साडेदहाला आयोजित केला. तसे प्रसिद्धी माध्यमांना कळविण्यात आले. मेळाव्याला माजी आमदार उदयसिंह राजपूत, बाळासाहेब थोरात, राजू शिंदे, सुरेश बनकर, दिनेश परदेशी, दत्ता गोर्डे उपस्थित राहतील.