नोकरीसाठी मुलाखत द्यायला चाललो आहे, असे सांगून परळी तालुक्यातील दैठणा घाट या आपल्या मूळ गावावरून निघालेला आमदार रत्नाकर गुट्टे यांच्या सख्ख्या भाचीचा मुलगा पिंपरी-चिंचवड शहरातून बेपत्ता झाला आहे. ही घटना दोन जानेवारीला पिंपळे निलख येथील रक्षक चौकात घडली आहे. सुमीत भागवत गुट्टे (वय २४, रा. दैठाना घाट, ता. परळी, जि. बीड) असे बेपत्ता झालेल्या तरुणाचे नाव आहे. या प्रकरणी सुमीत यांच्या आईने सांगवी पोलिस ठाण्यात तक्रार दिली आहे.

पोलिसांनी दिलेल्या माहितीनुसार, फिर्यादी यांचा मुलगा सुमीत याचे नर्सिंगचे शिक्षण पूर्ण झाले आहे. तो नोकरीसाठी प्रयत्न करीत होता. पाच ते सहा दिवसांपूर्वी तो गावावरून पिंपरी-चिंचवड येथे आला. ज्युपिटर हॉस्पिटलला मुलाखतीसाठी चाललो आहे, असे सांगून तो गावावरून शहरात आला. दोन दिवस तो आळंदी येथे राहिला. त्यानंतर गुरुवारी सकाळी तो रक्षक चौक येथे आला. मात्र, तेथून तो बेपत्ता झाला. त्याचा फोनही त्यानंतर बंद येत आहे. शुक्रवारी तो पुणे स्थानकावर दिसला. पोलिस त्याचा शोध घेत आहेत.

…म्हणून मूक मोर्चास गुट्टे नव्हते

परभणी जिल्ह्यातील गंगाखेड विधानसभेचे प्रतिनिधित्व करणारे आमदार रत्नाकर गुट्टे यांच्या भाचीला गुट्टे यांच्या गावातच दिले आहे. सुमीत हा त्यांच्या भाचीचा मुलगा आहे. सरपंच संतोष देशमुख यांच्या हत्येच्या निषेधार्थ परभणीत सर्वपक्षीय मूक मोर्चा काढण्यात आला होता. मात्र, आमदार गुट्टे या मोर्चाला उपस्थित राहू शकले नाहीत. आपला नातू बेपत्ता झाला असल्याने मला या मोर्चात सहभागी होता आले नाही, असे त्यांनी स्थानिक पत्रकारांशी बोलताना सांगितले.