खाडीपात्रातून अवैध रेती उपसा

खाडीपात्रात होणाऱ्या रेती उपसाप्रकरणी मागील काही दिवसांपासून खासदार म्हात्रे यांनी नागले बंदर तसेच भिवंडी तहसीलदार कार्यालयात भेट घेऊन महसूल यंत्रणेला कारवाई करण्याचे निर्देश दिले होते. मात्र प्रशासनाकडून कोणतीही कारवाई होत नसल्याने ठाणे जिल्हाधिकारी कार्यालयात अपर जिल्हाधिकारी मनीषा जायभाये यांची म्हात्रे यांनी भेट घेत अवैध रेती उपसा करणाऱ्या रेती माफियांवर कारवाई करण्याची मागणी केली. यावेळी तालुक्यातील तांडेल मंडळ आणि डुबी मारून रेती काढणारे व्यावसायिक मोठ्या संख्येने उपस्थित होते.
इराणला गेला अन् बेपत्ता झाला, २४ दिवसांपासून संपर्क नाही; पतीच्या शोधासाठी तिची धावाधाव, काय घडलं?

रेती माफियांवर कारवाईचे आदेश

भिवंडीला समृद्ध खाडी किनारा लाभला असून खाडीपात्राच्या किनारी असलेल्या गावांमध्ये डुबी मारून रेती काढण्याचा व्यवसाय अनेक वर्षांपासून होतो. मात्र या चुकीच्या रेती उपश्याने तालुक्यातील हजारो स्थानिक भूमिपुत्र आणि डुबी मारून रेती काढणाऱ्या व्यावसायिकांचा पारंपरिक व्यवसाय बंद झाला असून या रेती माफियांवर कारवाई करण्याची मागणी खासदार म्हात्रे यांनी यावेळी केली.

निकष तपासण्याचे आश्वासन

या बैठकीत येत्या आठ दिवसात संबंधित रेती माफियांवर कारवाई करण्यात येणार असून मेरीटाइम बोर्डाने दिलेल्या परवानगीचे निकष तपासण्यात येतील असे आश्वासन अपर जिल्हाधिकारी मनीषा जायभाये यांनी दिले असल्याची माहिती म्हात्रे यांनी पत्रकारांशी बोलताना दिली. दरम्यान, केवळ भिवंडीमध्येच नाही, तर महाराष्ट्रातील अनेक भागात अशाप्रकारे अवैधरित्या रेती उपसा, वाळू वाहतूक होत असल्याचं चित्र असून त्यावर कारवाई करणं गरजेचं ठरत आहे.