याप्रकरणी मिळालेल्या माहितीनुसार, पालघर तालुक्यातील बोईसर येथील लोखंडीपाडा परिसरात एका छोट्याशा खोलीत पंधरा वर्षाचा मुलगा त्याच्या आई- वडिलांसोबत वास्तव्यास होता. घरची परिस्थिती अत्यंत हालाखीची असताना आपल्या मुलाला चांगले शिक्षण मिळावे यासाठी त्या अल्पवयीन मुलाचे आई – वडील अत्यंत मेहनत करत होते. त्यांनी मुलाला बोईसर येथील एका नामांकित इंग्रजी माध्यमाच्या शाळेत टाकलं होतं. सध्या तो इयत्ता नववीत शिक्षण घेत होता.

मात्र, मागील दोन-तीन दिवसांपासून तो शाळेत जात नसल्याची माहिती आहे. यादरम्यान, त्याचे आई-वडील घराबाहेर कामानिमित्त घराबाहेर गेले असताना मंगळवारी सायंकाळच्या सुमारासच्या घरात कोणीही नसताना त्याने गळफास घेत आत्महत्या केली.

आपलं आयुष्य संपवण्यापूर्वी त्याने आई-वडिलांसाठी काही व्हॉईस रेकॉर्डिंग आणि एक सुसाईड नोट लिहून ठेवल्याचाही माहिती आहे. तुम्ही दोघे वाईट वाटून घेऊ नका, तुम्ही दोघेही माझ्यावर, माझ्या शिक्षणावर खर्च करत आहात. मात्र, हे सर्व मी वाया घालवत आहे. मी शाळेत जात नाही, लोक माझी थट्टा करतात ते मला आवडत नाही. मला माफ करा…. असे व्हॉइस रेकॉर्डिंग करून त्यानंतर अल्पवयीन मुलाने आत्महत्या करत आपले जीवन संपवले आहे.

आपल्या एकुलत्या एक मुलाने अशाप्रकारे आत्महत्या का केली, त्याला नेमका काय त्रास होता, असे असंख्य प्रश्न नितीनच्या आई- वडिलांना सतावत असून मुलाच्या जाण्याने त्यांना मोठा धक्का बसला आहे. मुलाच्या आत्महत्या प्रकरणाची चौकशी करून यामध्ये दोषी आढळल्यास त्या दोषींवर कारवाईची मागणी वडिलांनी केली आहे. आत्महत्येचे नेमके कारण अद्याप अस्पष्ट असून याप्रकरणी बोईसर पोलीस ठाण्यात अकस्मात मृत्यूची नोंद करण्यात आली असून पोलीस अधिक तपास करीत आहेत.