10 डिसेंबर रोजी परभणी येथे डॉक्टर बाबासाहेब आंबेडकर पुतळा परिसरात असलेल्या संविधानाच्या प्रतिकृतीची विटंबना झाली होती त्यानंतर 11 डिसेंबर रोजी परभणी बंद दरम्यान आंबेडकरी अनुयायांकडून शहरात तोडफोड झाली आणि त्याला प्रत्युत्तर म्हणून पोलिसांनी लाठी चार्ज केला होता.याची पाहणी करण्यासाठी आज केंद्रीय सामाजिक न्याय राज्यमंत्री रामदास आठवले परभणी दौऱ्यावर आले होते. यावेळी त्यांनी पत्रकारांशी संवाद साधताना सर्वच प्रश्नांना उत्तरे दिली.

पुढे बोलताना मंत्री रामदास आठवले म्हणाले की, आंबेडकरी जनता ही संविधानावर प्रचंड प्रेम करते. संविधानाचा अपमान झाल्यानंतर ती रस्त्यावर उतरून निषेध करणारच. या निषेध दरम्यान पोलिसांनी जो लाठी चार्ज केला त्याची चौकशी होणे गरजेचे आहे. त्याचबरोबर निरपराध नागरिकांवर दाखल करण्यात आलेले गुन्हे देखील वापस घेण्यासाठी मी मुख्यमंत्र्यांना सांगणार आहे. कोंबिंग ऑपरेशन करण्याची गरज नव्हती ते मी थांबविण्यासाठी मुख्यमंत्र्यांना सांगितले होते असेही ते म्हणाले. या संपूर्ण प्रकरणाचा सखोल तपास झाला पाहिजे अशी ही मागणी केली असल्याचे ते म्हणाले.

राज्यात एक मंत्रीपद व एक विधान परिषद मिळेल ही अपेक्षा

आज उद्या राज्य मंत्रिमंडळाचा विस्तार होत आहे. रिपब्लिकन पक्षामुळे महायुतीमध्ये बॅलन्स आहे. महायुती मधला सर्वात अगोदरचा घटक पक्ष हा रिपब्लिकन पक्ष आहे. लोकसभेला आम्हाला जागा मिळाली नाही विधानसभेला दोन जागा मिळाल्या पण उमेदवार भाजपचाच राहिला त्यामुळे आता राज्यात होणाऱ्या मंत्री पदांच्या शपथविधीमध्ये रिपब्लिकन पक्षाला एक मंत्रीपद मिळावे त्याचबरोबर एक विधान परिषदेची जागा मिळावी अशी अपेक्षा मंत्री रामदास आठवले यांनी व्यक्त केली आहे.

शरद पवार आणि अजित पवार एकत्र आले तर चांगलेच

मी वेळोवेळी जेष्ठ नेते शरद पवार यांना आग्रह करीत आलेलो आहे की आपण नरेंद्र मोदी सोबत महायुतीमध्ये सहभागी व्हावे आणि देशाच्या विकासात हातभार लावावा. आता अजित पवार तर आमच्या सोबतच आहेत पण आता शरद पवार आणि अजित पवार एकत्र झाले तर महायुतीची ताकद वाढेल आणि देशाच्या विकासात भर पडेल हे दोघे एकत्र आलेले चांगले राहील असेही मंत्री रामदास आठवले म्हणाले.