या अपघातामध्ये दक्षु शर्मा (वय २१, वर्षे राहणार दिल्ली), आदित्य कणसे (राहणार मुंबई) या दोघांचा अपघातात मृत्यू झाला आहे. बारामती तालुका पोलीस स्टेशन हद्दीतील मौजे जैनकवाडी गावामध्ये, लामजेवाडी गावाजवळ बारामती येथे वैमानिक प्रशिक्षण घेणारे चार विद्यार्थी बारामतीहून भिगवनच्या दिशेने चालले होते. गाडीतून जात असताना वळणावर चालकाचे गाडीवरील नियंत्रण सुटून हा अपघात झाला.

या अपघातात दक्षू शर्मा आणि आदित्य कणसे या दोघांचा मृत्यू झाला आहे. तर, चेष्टा बिश्नोई नावाची तरुणी आणि कृष्णासून सिंग या दोघांवर भिगवण येथील रुग्णालयात आयसीयूत उपचार सुरू आहेत. या भीषण अपघातात जखमी झालेल्या मुलांची परिस्थिती गंभीर आहे.

सदर अपघाताची माहिती मिळताच भिगवण पोलीस स्टेशनचे अधिकारी आणि पथक, बारामती तालुका पोलीस स्टेशनचे अधिकारी आणि पथक, खाजगी रुग्णवाहिका चालक केतन वाहक यांनी तात्काळ घटनास्थळ गाठलं. जखमींना उपचारासाठी भिगवनच्या रुग्णालयातील अतिदक्षता विभागात दाखल करण्यात आलं असून सध्या त्यांच्यावर उपचार सुरु आहेत. सध्या त्यांची प्रकृती गंभीर असल्याची माहिती पोलिसांनी दिली आहे. तसेच, हा अपघात नेमका कसा झाला, याबाबतचा तपासही पोलीस करत आहेत.

चंद्रपुरात तीन मित्रांचा भीषण अपघात, दोघांचा मृत्यू

चंद्रपुरातही एक भीषण अपघात झाला आहे. येथे बाबूपेठ उड्डाण पुलावरुन जात असताना दुचाकीला एका अज्ञात वाहनाने जोरदार धडक दिली. या धडकेनंतर दुचाकीवरुन प्रवास करत असलेले तिनही मित्र हे पुलावरुन थेट खाली कोसळले. या घटनेत दोन मित्रांचा मृत्यू झाला आहे. तर, तिसरा मित्र हा गंभीर जखमी असल्याची माहिती आहे. या भीषण अपघातात दुचाकीचालक आर्यन मेश्राम याचा घटनास्थळीच मृत्यू झाला. तर त्याचा मित्र रवी ऊर्फ साहिल संजय ढवस याचा उपचारादरम्यान मृत्यू झाला आहे. तर, तिसरा मित्र सुयोग सुरेश डांगे हा गंभीर जखमी असल्याची माहिती आहे.