ठाणे: राज्याचे मुख्यमंत्री एकनाथ शिंदे आणि उपमुख्यमंत्री अजित पवार या दोघांबद्दल मला वाईट वाटते. दोघे महाराष्ट्राचे दादा होते. लोकसभा तिकीट वाटपात जे शिंदेंचे झाले तेच दादांचे झाले आहे. दुसरीकडे शिंदे हे युद्ध जिंकले असे म्हणतात. पण, तुम्ही युद्धात जिंकलात पण तहात हारलात. हीच महाराष्ट्रातील वाईट गोष्ट आहे, अशी टीका राष्ट्रवादी काँग्रेस शरद पवार पक्षाचे आमदार डॉ. जितेंद्र आव्हाड यांनी केली.शुक्रवारी ठाणे प्रसारमाध्यमांशी बोलताना आव्हाडांनी एकनाथ शिंदे आणि अजित पवार यांच्यावर टीका केली. महाराष्ट्रातील नेते जागा वाटपासाठी दिल्लीला जातात असा प्रश्न विचारला असता आव्हाडांनी शिंदे आणि अजितदादा या दोघांबद्दल मला येवढेच वाईट वाटते, ते दोघे महाराष्ट्राचे दादा होते. तर महायुतीत जाण्यापूर्वी अजितदादा हे सिल्वर ओकवर चार-पाच जणांना बोलायचे, साहेबांबरोबर बसायचे, आणि मिळालेल्या जागांवर तेथेच पेन घेऊन लिहून काढायचे. त्याच्यावर साहेबांची सही घेऊन यादी खिशात टाकत आणि ताट मानेने बाहेर पडायचे. आता तेथे त्यांना माहीत नाही. त्यांना कुठल्या जागा मिळाल्या आहेत. उमेदवार कुठला आहे. अशी टीका आव्हाड यावेळी केली.
दिल्लीच्या बाजारात निष्ठा विकून पवारांची साथ सोडणारा मी नाही, रोहित पवारांची तटकरेंवर सडकून टीका
ज्या चार जागा जाहीर केल्या. त्यामध्ये एक जागा निवडून आलेला खासदार आणि एक स्वतःची पत्नी. बाकी भाजपने पाठवून दिलेले ही आमची माणसे आहेत, अशी टीका आव्हाडांनी यावेळी अजितदादांवर केली. तर मुख्यमंत्री एकनाथ शिंदे यांनी सांगितल्याशिवाय मातोश्रीवर पान हलत नव्हते. त्यांची एवढी पकड होती. पण महायुतीत हेमंत गोडसे यांना दिलेले तिकीट काढून घेतले यावरून बंडामध्ये आपल्या सोबत होते. त्यांचे जीव वाचवण्याचे काम करायला पाहिजे होते. युद्धात साथीदाराला एकटे सोडायचे नसते, त्याला बरोबर आणायचे असते, अशी टीका शिंदे यांच्यावर आव्हाडांनी केली. तसेच युद्ध जिंकले असे म्हणता पण युद्धात जिंकलात पण तहात हारलात, हीच महाराष्ट्रातील वाईट गोष्ट आहे, असे बोलून त्यांनी शिंदेंवर टीका केली.

ठाण्यातील महायुतीच्या जागा वाटपाबद्दल विचारले असता, दुसरा काय करतो ज्याच्याकडे मी लक्ष देत नाही. तसेच त्यांच्या उमेदवारावर भाष्यही करत नाही. पण सकाळी, दुपारी आणि संध्याकाळी ठाण्यातील बंगल्यावर मिटिंग सुरू असतात. तसेच बंगल्यातून बाहेर आल्यावर हसत येतात आणि नंतर फोनाफोनी सुरू होते. त्यामुळे त्यांच्या घरात काय चालले आहे याचे काय करायचे. मला माझे घर चांगले ठेवायचे आहे, असे यावेळी आव्हाड म्हणाले.

प्रताप सरनाईक यांना उमेदवारी मिळेल अशी मला खात्री आहे. याशिवाय माजी आमदार रवींद्र फाटक असो या आमदार प्रताप सरनाईक या प्रत्येकाला निवडणुकीच्या रिंगणात उतरण्याचा अधिकार आहे. याशिवाय उमेदवारी मागणे चुकीचे नाही असे ही आव्हाडांनी यावेळी सांगितले. पुढे बोलताना माझी मनापासून इच्छा आहे, सरनाईक यांना लोकसभेची तिकीट मिळावी. असे बोलून आव्हाडांनी राजकीय विरोधक असताना सरनाईकांवरील मित्रप्रेम बोलण्यातून दाखवून दिले.