इरफान शेख, सोलापूर : सोलापूर लोकसभा मतदारसंघात एमआयएमची भूमिका महत्वाची ठरणार आहे. भाजप, काँग्रेस अशी लढत होईल की काय अशी शक्यता वर्तवली जात असताना, वंचितने उमेदवार देऊन तिरंगी लढत केली आहे. एमआयएम सोलापूर शहर आणि जिल्हा प्रमुख फारूक शाब्दी यांनी आपली भूमिका स्पष्ट करत, सोलापूर लोकसभा मतदारसंघात उमेदवार देणार असल्याची ठाम भूमिका जाहीर केली आहे.

आम्ही दुसऱ्या कोणत्या पार्टीचा किंवा उमेदवाराचा जराही विचार करणार नाही, राम सातपुते असो किंवा प्रणिती शिंदे असो आमचा देखील तगडा उमेदवार सोलापूर लोकसभा मतदारसंघात उमेदवारी अर्ज दाखल करणार. सोलापूर लोकसभा मतदार संघ हा अनुसूचित जातीसाठी राखीव आहे. त्यामुळे राखीव प्रवर्गातील इच्छुक उमेदवारांनी एमआयएमकडे इच्छा दर्शवली आहे. फारूक शाब्दी यांनी पुढे बोलताना असेही सांगितले, सोलापूर लोकसभा मतदारसंघात असा उमेदवार देणार आहे, जो सर्वच विरोधकांना घाम फोडणार आहे.
खोटं प्रसिद्ध करून माझं चारित्र्यहनन करण्याचा भाजप प्रयत्न करेल, प्रणिती शिंदे यांचा हल्लाबोल
प्रणिती शिंदे असो किंवा राम सातपुते असो, आमचा उमेदवार असणारच
सोलापूर लोकसभेच्या काँग्रेस उमेदवार प्रणिती शिंदे आणि राम सातपुते यांच्यात राजकीय कलगीतुरा रंगला आहे. दोघेही एकमेकांवर खालच्या पातळीवर जाऊन टीका करत आहेत, मात्र दोघांच्या या टीका टिप्पणीत मला पडायचे नाही असे फारूक शाब्दी यांनी सांगितले.

सोलापूर लोकसभेच्या निवडणुकीच्या रिंगणात प्रणिती शिंदे असो किंवा राम सातपुते असो आम्ही कुणाचाही विचार करणार नाही. महाविकास आघाडीमधील नेते आम्हाला समाविष्ट देखील करून घेत नाहीत आणि लढूही देत नाहीत. त्यामुळे पार्टी अध्यक्ष असद ओवैसी यांच्या आदेशानुसार सोलापूर लोकसभा मतदारसंघात उमेदवार देण्याचा निर्णय घेण्यात आला आहे.
परभणीतून अर्ज भरणाऱ्या ‘फकीर’ महादेव जानकर यांची संपत्ती किती? शपथपत्रांमधून माहिती समोर
सर्व उमेदवारांचा घाम फोडणारा उमेदवार देऊ
सोलापूर लोकसभा मतदार संघात एमआयएमकडे एकूण चार जणांनी इच्छा दर्शवली आहे. मोहोळ येथील माजी आमदार रमेश कदम यांना जर एमआयएमकडून उमेदवारी मिळाली तर, याचा फटका नक्कीच बसेल. कारण रमेश कदम हे सोलापूरसह जिल्हाभरात लोकप्रिय आहेत.

मागेल त्याला पाणी आणि मागेल त्याला रस्ता अशी संकल्पना राबवणारे रमेश कदम यांच्यासोबत एमआयएमच्या वरीष्ठ नेत्यांची बोलणी सुरू आहे अशी माहिती एमआयएमचे सोलापुरातील प्रमुख आणि वरीष्ठ नेते फारूक शाब्दी यांनी दिली आहे. एमआयएम पक्षाचा उमेदवार सोलापूर लोकसभा मतदारसंघात सर्वांचा घाम फोडणार असेल असा विश्वासही फारूक शाब्दी यांनी व्यक्त केला आहे.