शुभम बोडके, नाशिक : नाशिक लोकसभा मतदारसंघात सेना-भाजपच्या वादात राष्ट्रवादी अजित पवार गटाने देखील उडी घेतली आहे. शिंदेंच्या विद्यमान खासदाराच्या उमेदवारीला भाजपने कडाडून विरोध दर्शवला आहे. मात्र यात आता राष्ट्रवादी अजित पवार गटाचे नेते छगन भुजबळ यांनी देखील आपल्या उमेदवारीवर सूचक वक्तव्य केले आहे. माझे नाव चर्चेत असले तरी, शिवसैनिकांनी मी देखील पूर्वाश्रमीचा शिवसैनिक आहे. माझ्या नावावर आपले दुमत नसावे असे सूचक वक्तव्य छगन भुजबळ यांनी पत्रकारांशी बोलताना म्हंटले आहे. त्यामुळे छगन भुजबळ हे नाशिक लोकसभा मतदारसंघात महायुतीचे उमेदवार असू शकतात अशी चर्चा आता नाशिकमध्ये जोर धरू लागली आहे.छगन भुजबळ हे निवडणुकीच्या मैदानात उतरण्याची शक्यता वर्तवली जात असताना नाशिकमधील मराठा समाज देखील आक्रमक भूमिका घेत असल्याचे पाहायला मिळत आहे. गुरुवार (२८. मार्च) रोजी नाशिकमधील सकल मराठा समाजाची बैठक पार पडणार आहे. नाशिकच्या तपोवन येथील शेवंता लॉन्स येथे बैठक आयोजित करण्यात आली आहे. मनोज जरांगे पाटलांच्या आवाहनानंतर नाशिकमध्ये ही बैठक पार पडणार आहे. या बैठकीतून जरांगे पाटलांना अहवाल देणार असून त्यानंतर पुढील दिशा मराठा समाज ठरवणार आहेत. मात्र सकल मराठा समाजाच्यावतीने अपक्ष उमेदवार देखील देणार असल्याची माहिती समोर आली आहे. मात्र मराठा समाजाकडून अपक्ष उमेदवारी करता कोणाला मैदानात उतरले जाते हे बघणं देखील तितकच महत्त्वाचं असणार आहे.
राष्ट्रवादी होती-आहे दादांच्या मनात, आढळराव पाटलांच्या मनगटावर घड्याळ, अमोल कोल्हे यांना टक्कर देणार!

नाशिक लोकसभा निवडणुकीत भाजप आणि सेनेच्या वादातून तोडगा काढत महायुतीची उमेदवारी ही छगन भुजबळ यांना देण्याची शक्यता वर्तवली जात आहे. मात्र छगन भुजबळ यांनाही उमेदवारी दिल्यामुळे केंद्रात भाजपला ओबीसी नेतृत्व मिळू शकते राज्यात भुजबळ यांनी घेतलेल्या ओबीसी मेळाव्याची कठोर भूमिका ही देखील भाजपला ओबीसी समाजाची मोठी वोट बँक मिळून देऊ शकते. नाशिक लोकसभा मतदारसंघातून छगन भुजबळ यांना उमेदवारी दिल्याने नाशिकमधील भुजबळांचे बळ हे भाजपला नक्कीच मिळू शकते. त्यामुळे भाजपची ग्रामीण भागातील ताकद ही भुजबळांमुळे महायुतीला सक्षम करण्यास भाग पडू शकते. त्यामुळे छगन भुजबळ यांनी नाशिक लोकसभेतून उमेदवारी केल्यास नाशिकच्या विकास हा सक्षम नेतृत्वाकडे जाऊ शकतो, अशी देखील चर्चा भुजबळ समर्थकांकडून व्यक्त केली जात आहे.

नाशिक लोकसभा मतदारसंघात जवळपास ३० टक्के मराठा मतदार आहेत. छगन भुजबळ यांची २०१४ आणि २०१९ची लढत ही मराठा उमेदवार समोरचं प्रामुख्याने पाहायला मिळाली. त्यामुळे २०१४ साली समीर भुजबळ यांचा मराठा मतांमुळे पराभव झाला होता. तर २०१९च्या निवडणुकीत छगन भुजबळ यांचा देखील मराठा फॅक्टरमुळे दारुण पराभव झाला होता. दोन पंचवार्षिकचा वचपा काढण्यासाठी छगन भुजबळ हे पुन्हा लोकसभा निवडणुकीच्या रिंगणात उतरत आहेत. मात्र छगन भुजबळ हे मराठा विरोधी भूमिका घेत असले तरी देखील भुजबळांची एक मोठी समता परिषदेची ताकद नाशिक जिल्ह्यात असल्यामुळे भुजबळांचा ग्रामीण भागात भाजपला फायदा होऊ शकतो. नाशिकमधील लढतीत छगन भुजबळ हे ओबीसी विरुद्ध मराठा लढतीत सरस ठरण्याची परिस्थिती सध्या तरी पाहायला मिळत आहे. त्यामुळे भाजप कोणत्याही परिस्थितीत नाशिक लोकसभेची जागा गमवण्याची शक्यता नसल्याने भुजबळ यांना पुन्हा उमेदवारी देत मराठा मतांपैकी भुजबळांचा वापर करत भाजप ग्रामीण भागात सक्षम करण्यासाठी भुजबळ यांना संधी देऊ शकते आणि मराठ्यांचा रोष घेण्याच्या तयारीत भाजप पाहायला मिळत आहे.

दरम्यान, छगन भुजबळ यांना नाशिक लोकसभेतून महायुतीची उमेदवारी मिळण्याची दाट शक्यता असताना भाजप आणि शिंदे यांच्या वादावर तोडगा काढण्यासाठी भुजबळांना भाजप बळ देऊ शकते. त्यामुळे भाजप मतदार संघातील भाजप विरुद्ध राष्ट्रवादी वैर संपवण्याचा देखील डाव यातून निकाली काढण्याचा प्रयत्न करत असल्याची भावना आता पाहायला मिळत आहे. भाजपचा धक्का तंत्राचा वापर हा भुजबळांना बळ देण्याचा तर नाही ना? भुजबळ यांना दिल्लीत पाठवून जिल्ह्यातील भुजबळांची ताकद ही भक्कम महायुतीच्या मागे वळवण्याच्या प्रयत्नात भाजप यशस्वी ठरतं का? हे देखील बघ ना आता महत्त्वाचं ठरणार आहे. भाजपची हिंदुत्वाची भूमिका आणि भुजबळांची मुस्लिम, दलित वोट बँक वळवण्यात भाजप किती यशस्वी ठरत हे देखील बघणं आता महत्त्वाचं ठरणार आहे.