निलेश पाटील, जळगाव : जळगाव जिल्ह्यातील भाजप पक्षातील अंतर्गत धुसफूस समोर आली आहे. भाजपच्या अंतर्गत बैठकीत मंत्री गिरीश महाजन यांच्यासमोरच खासदार रक्षा खडसे आणि पक्षाच्या पदाधिकाऱ्यांमध्ये जोरदार खडाजंगी झाली असल्याचं समोर आलं आहे. या वादाचा व्हिडिओ सोशल मीडियावर व्हायरल झाला आहे. आता या व्हिडिओबाबत खासदार रक्षा खडसे यांनी आपलं स्पष्टीकरण दिलं आहे.रक्षा खडसे त्या व्हिडिओबाबत म्हणाल्या की, ”काल मला माहित पडलं आहे. हा व्हिडिओ सोशल मीडियावर व्हायरल होत आहे. तिथे जे उपस्थित होते त्यांनीच हा व्हिडिओ व्हायरल केला आहे, असं देखील माझ्या कानावर आलेलं आहे. ही गोष्ट गेल्या आठ दिवसांची आहे. त्यामध्ये कुठलेही तथ्य नाही. सर्व घटना घडल्यानंतर मंत्री गिरीश महाजन यांनी माध्यमांसमोर सांगितलेलं आहे की, काही छोटे मोठे विषय होते, ते सर्वांशी बोलून आम्ही दूर केलेले आहेत. रक्षा खडसे यांना पाच लाखाच्या मताधिक्याने निवडून आणू असेही मंत्री गिरीश महाजन यांनी सांगितले आहे”, असं रक्षा खडसे यांनी प्रसारमाध्यमांशी बोलून आपलं स्पष्टीकरण दिलं आहे.
नाथाभाऊंच्या प्रचारासाठी नोकरीचा राजीनामा दिला, कार्यकर्त्याने खासदार रक्षा खडसेंची बोलती बंद केली!

कोर कमिटीची ही बैठक होती. त्यात काही कार्यकर्त्यांच्या भावना दुखावलेल्या होत्या. त्यामुळे साहजिकच काम करताना काही चुका झाल्या असतील, तर त्या त्यांनी बैठकीत मांडलेल्या आहेत. कोर कमिटीमधील व्हिडिओ बाहेर व्हायरल करणे हे चुकीचे आहे. भारतीय जनता पार्टी हा एक शिस्तप्रिय पक्ष म्हणून ओळखला जातो. ज्याने कोणी हा व्हिडिओ व्हायरल केला आहे. त्याला पक्ष नक्कीच विचारण करेल”, असं देखील रक्षा खडसे यांनी म्हटलं आहे.

व्हिडिओत काय दिसतंय?

जळगाव आणि रावेर लोकसभा मतदारसंघातील सर्व पदाधिकारी व कार्यकर्त्यांची बैठक दिनांक १९ मार्च रोजी ब्राह्मण सभागृहात पार पडली. वरणगाव येथील काही पदाधिकारी व कार्यकर्ते या बैठकीला उपस्थित होते. त्यांनी मंत्री गिरीश महाजन यांच्याकडे खासदार रक्षा खडसे यांच्याबाबत तीव्र नाराजी व्यक्त केली. यावर मंत्री गिरीश महाजन यांनी त्यांना कार्यालयात येण्यास सांगितले. त्या ठिकाणी कार्यकर्ते गेल्यावर पदाधिकारी व कार्यकर्त्यांमध्ये गुप्त बैठक सुरू होती. मात्र या बैठकीत वाद झाला होता.

बैठकीतील खडाजंगीचे व्हिडिओ सोशल मीडियाद्वारे व्हायरल झाल्याने भाजपाचा अंतर्गत वाद चव्हाट्यावर आला आहे. या व्हिडिओत मंत्री गिरीश महाजन आमदार राजू मामा भोळे, आमदार मंगेश चव्हाण, जळगाव लोकसभेच्या उमेदवार स्मिता वाघ तसेच खासदार रक्षा खडसे दिसत आहे. यात वरणगाव येथील माजी नगराध्यक्ष सुनील काळे यांनी थेट रक्षा खडसे यांच्यावर आरोप केले. खडसे आमच्याकडे दुर्लक्ष करत असल्याचे त्यांनी महाजन यांच्यासमोर सांगितले.