शुभम बोडके, नाशिक : नाशिक शहरात एका आठवड्यात एक खुनाची घटना घडत आहे. पंचवटी परिसरात सर्वाधिक खुनाची घटना घडत असल्याची नोंद होत असल्याने पंचवटी परिसरातील गुन्हेगारीने उच्चांक गाठल्याचं पाहायला मिळत आहे. मध्यरात्री उशिरा दीड वाजेच्या सुमारास एका सराईत गुन्हेगाराची हत्या झाल्याची घटना घडली आहे. निलेश श्रीपत उफाडे (वय २१) असं हत्या झालेल्या युवकाचं नाव आहे. ही हत्या मागील कुरापत काढून झाल्याची माहिती समोर येत आहे.पोलिसांनी दिलेल्या माहितीनुसार, नाशिकच्या पंचवटी परिसरातील फुलेनगर येथील म्हाडा बिल्डिंग येथे सुलभ शौचालय परिसरात पहाटे दीड वाजेच्या सुमारास सराईत गुन्हेगाराची हत्या झाल्याची घटना घडली आहे. धारदार शस्त्राने वार करत ही हत्या झाल्याची घटना समोर आली आहे. कुरापत का काढतो? या किरकोळ कारणामुळे ही हत्या झाल्याचं पोलिसांनी सांगितलं आहे. हत्या करणारे सहा आरोपी निष्पन्न देखील झाले आहेत. सहापैकी चार अल्पवयीन असल्याची माहिती समोर आली आहे. तर दोन सज्ञान असल्याची माहिती समजते आहे.
मातोश्रीवर महाविकास आघाडीचे महामंथन, पवार राहणार उपस्थित, ठाकरे गटाचे १९ संभाव्य उमेदवार समोर

संशयित आरोपी हे रेकॉर्डवरील गुन्हेगार असल्याचे देखील पोलिसांनी सांगितलं आहे. भांडणाची कुरापत काढून ही हत्या झाल्याचं पोलीस तपासात निष्पन्न झालं आहे. या घटनेला पंचवटी परिसरात एकच खळबळ उडाली आहे. पंचवटी पोलिसांनी केलेल्या तपासात मारेकरी निष्पन्न झाले असून पोलीस या हत्येसंदर्भात कसून चौकशी करत आहे. मात्र, या हत्यानंतर पंचवटी परिसरातील गुन्हेगारी पुन्हा एकदा अधोरेखित झाले आहे. हत्या झालेल्या युवकाच्या कुटुंबियांनी मारेकऱ्यांवर कठोर कारवाई करावी, अशी मागणी केली आहे. शौचालयाला असताना हा हल्ला झाल्याची प्राथमिक माहिती पोलिसांनी दिली आहे. यातील मुख्य आरोपींचा शोध सुरू असून लवकरात लवकर त्यांना अटक करण्यात येईल, असं देखील पोलिसांनी सांगितलं आहे.