दुसरीकडे मास्कवादी कम्युनिस्ट पक्षाचे माजी आमदार जे.पी.गावित हे देखील या जागेवर दावा करत आहे. राज्यात कम्युनिस्ट पक्ष हा महाविकास आघाडीसोबत आहे. त्यामुळे राज्यातून दिंडोरी लोकसभा मतदारसंघाची एकमेव जागा ही कम्युनिस्ट पक्षाला सोडावी, अशी मागणी माकपाने केली आहे. शरद पवारांच्या राष्ट्रवादीतील भगरे हे सक्षम उमेदवार नसल्याचा थेट आरोप जे.पी.गावित यांनी केला. तर दिंडोरी लोकसभा मतदारसंघातील माकपाची ताकद बघता ही जागा महाविकास आघाडीने कम्युनिस्ट पक्षाला सोडावी अशी मागणी आता जोर धरू लागली आहे. त्यामुळे महाविकास आघाडीतून दिंडोरी लोकसभा मतदारसंघ हा कोणाच्या वाटेला जाणार हे अजून तरी स्पष्ट झालं नाहीय.
दिंडोरी लोकसभा मतदारसंघात शरद पवार गट आणि माकपाची ताकद किती?
दिंडोरी लोकसभा मतदारसंघात शरद पवारांना मानणारा मोठा वर्ग आहे. दिंडोरी, निफाड, येवला, चांदवड या मतदारसंघात शरद पवारांची ताकत मोठी आहे. द्राक्ष आणि कांदा उत्पादक शेतकऱ्यांसह ऊस उत्पादक शेतकऱ्यांची मोठी फळी शरद पवारांच्या मागे पाहायला मिळते. त्यामुळे शरद पवारांच्या राष्ट्रवादीच्या उमेदवाराला दिंडोरी लोकसभा मतदारसंघातील सहा विधानसभा मतदारासंघांपैकी चार मतदारसंघातून मोठी ताकद मिळू शकते. तसेच फुटाफुटीच्या राजकीय वातावरणाानुसार शरद पवारांना सहानुभूतीचा देखील मोठा फायदा होऊ शकतो. तर दुसरीकडे आदिवासी मतदानाचा टक्का बघता माकपचे हे मतदार लाल झेंड्याखाली एकवटले जाऊ शकतात. त्यामुळे महाविकास आघाडीतील दिंडोरी लोकसभा मतदार संघ भाजपला शह देण्यासाठी पवारांच्या खेळीचा मोठा फायदा आघाडीचे उमेदवाराला होऊ शकतो. त्यामुळे पक्ष आणि नेत्यांच्या संपर्कामुळे दिंडोरी लोकसभेत शरद पवारांचा उमेदवार सरस ठरू शकतो.
संभाव्य उमेदवारांचा मतदार संघात प्रभाव
दिंडोरी लोकसभा मतदारसंघात राष्ट्रवादीच्या शरद पवारांचा संभाव्य उमेदवार हा दिंडोरी विधानसभा मतदारसंघात मर्यादित चर्चेत आहे. भास्कर भगरे हे माजी जिल्हा परिषद सदस्य दिंडोरी राष्ट्रवादीच्या जडणघडणीतील शरद पवारांचे विश्वासू समजले जाणारे श्रीराम शेटे यांचे अत्यंत विश्वासू म्हणून यांची ओळख आहे. तर माकपचे माजी आमदार जे.पी.गावित हे दिंडोरी लोकसभा मतदारसंघात चर्चेतील नेतृत्व आहे. जे.पी.गावित यांनी २००९ आणि २०१९ ची लोकसभा निवडणूक लढवली. या निवडणुकीत गावित यांना एक लाख दहा हजार मते देखील पडली होती. तसेच आदिवासींच्या न्याय मागण्यासाठी नाशिक ते मुंबई आदिवासींचा लॉंग मार्च देखील जे.पी.गावित यांच्या नेतृत्वात काढण्यात आला होता. त्यामुळे उमेदवारांचा विचार करता जे.पी.गावित हे सक्षम उमेदवार ठरू शकतील. गावित यांची उमेदवारी महाविकास आघाडीने जाहीर केली तर पवारांची ताकत आणि गावित यांचा जनसंपर्क बघता दिंडोरी लोकसभा मतदार संघात भाजपच्या भारती पवार यांना नक्कीच ही निवडणूक जड जाऊ शकते.
दिंडोरी लोकसभा मतदारसंघ हा आदिवासी बहुल भाग असला तरी ऊस, कांदा, द्राक्ष उत्पादकांचा मतदारसंघ म्हणून ओळखला जातो. त्यामुळे केंद्राच्या शेतकरी विरोधी धोरणामुळे या मतदारसंघात भाजपच्या उमेदवाराला मोठा फटका बसू शकेल, अशी परिस्थिती पाहायला मिळत आहे. त्यामुळे दिंडोरी लोकसभा मतदारसंघात भाजप सलग चौथ्यांदा गड राखण्यात यशस्वी होतं की, महाविकास आघाडीची जुळवाजुळव यशस्वी ठरते हे बघणे आता महत्त्वाचं असणार आहे.