नांदेड : नांदेड जिल्हा परिषदेच्या प्राथमिक विभागाच्या शिक्षणाधिकारी सविता बिरगे यांना ‘कारणे दाखवा’ नोटीस बजावण्यात आली आहे. बदली प्रक्रियेत झालेल्या अनियमिततेप्रकरणी ही कारवाई करण्यात आल्याचे सांगण्यात आले.
मागील महिन्यात गोंधळ
फेब्रुवारी महिन्यात जिल्ह्यातील पदवीधर शिक्षकांना पदोन्नती देण्याच्या प्रक्रियेत मोठा गोंधळ उडाला होता. पदोन्नतीची प्रक्रिया पार पाडताना संबंधित पात्र शिक्षकांच्या समुपदेशाद्वारे बदल्या होतील, असे वाटत होते. समुपदेशनाची प्रक्रिया पार पडली खरी; पण शिक्षकांना नियुक्त्या देताना चक्क किनवट, माहूर, हिमायतनगर तालुक्यांचा रस्ता दाखवण्यात आला. अन्यायकारक पदोन्नत्या झाल्यामुळे बहुतांश शिक्षक संघटनांनी नाराजी व्यक्त केली होती. काही शिक्षकांनी माजी मुख्यमंत्री अशोक चव्हाण यांच्या कानावर ही बाबत घातली.
अनागोंदी समोर
खासदार चव्हाण यांनी शिक्षण विभागाच्या अधिकाऱ्यांसह, मुख्य कार्यकारी अधिकारी मीनल करनवाल यांना जाब विचारला. काही कालावधीनंतर या नियुक्त्या रद्द करून समुपदेशनाद्वारे झालेल्या बदल्या मान्य करत शिक्षकांना नियुक्त्या देण्यात आल्या. या संपूर्ण प्रकरणामुळे शिक्षण विभाग व जिल्हा परिषदेतील अनागोंदी समोर आली. समुपदेशनाची प्रक्रिया उपमुख्य कार्यकारी अधिकारी मुक्कावार व शिक्षणाधिकारी बिरगे यांच्या उपस्थितीत झाली होती. जिल्हा परिषदेच्या मुख्य कार्यकारी अधिकारी मीनल करनवाल यांनी शिक्षणाधिकारी बिरगे यांना ‘कारणे दाखवा’ नोटीस बजावली आहे. ‘सात दिवसांच्या आत खुलासा केला नाही, तर विभागीय चौकशीचा प्रस्ताव सरकारकडे पाठवण्यात येईल,’ असे नोटिशीत नमूद करण्यात आले आहे.
समन्वय राखण्याचा सल्ला
मुख्य कार्यकारी अधिकारी मीनल करनवाल यांनी केलेल्या कारवाईबाबत संमिश्र प्रतिक्रिया व्यक्त होत असली, तरी काही दिवसांपूर्वी करनवाल व शिक्षण विभागतल्या अधिकाऱ्यांना समन्वय राखून काम करण्याचा सल्ला काही लोकप्रतिनिधींनी दिला होता.