सोलापूर: शहरात अत्यंत दुर्दैवी घटना घडली आहे. अवंती येथील गुलमोहर सोसायटीत राहणाऱ्या युवकाचा हृदयविकाराच्या तीव्र झटक्याने मृत्यू झाला आहे. योगीराज साखरे याचं गुरुवारी सायंकाळी हृदयविकाराच्या झटक्यानं निधन झाले. तो २७ वर्षाचे होता. लग्नाच्या चार दिवस आधीच योगीराज यांचे निधन झाल्याने कुटुंब, नातेवाईक आणि मित्र परिवारावर दुःखाचा डोंगर कोसळला आहे. २६ मार्चला योगीराज यांचा विवाह ठरला होता. लग्नपत्रिका वाटण्याचे काम जोरात सुरू होते. लग्नाचा बस्ता खरेदी केला होता. तसेच घरात योगीराज यांच्या लग्नाची धामधुम सुरु होती. लग्नाच्या चार दिवस आधी ही दुःखद घटना घडली आहे.
शिर्डीत तरुणावर भरदिवसा गोळीबार, परिसरात दहशतीचे वातावरण, नेमकं काय घडलं?
योगीराजच्या कुटुंबात अध्यात्मिक वातावरण असून ते औंधकर मठाचे शिष्य होते. त्याच्या अकाली जाण्याने कुटुंबावर दुःखाचा डोंगर कोसळला आहे. हळद लागण्याआधी मुलाचे अंत्यसंस्कार करावे लागल्याने आईने फोडलेला हंबरडा काळीज हेलावून टाकणारा होता. शुक्रवारी सकाळी योगीराजच्या पार्थिवावर लिंगायत स्मशानभूमीत अंत्यविधी करण्यात आला. अंतिमसंस्कारच्या विधीत शहर भागातील नागरिक मोठ्या संख्येने उपस्थित होते. योगीराज हे प्रसिद्ध बांधकाम व्यावसायिक शैलेश साखरे यांचे ते थोरले चिंरजीव होते.

योगीराज साखरे यांच्या विवाहाची जय्यत तयारी करण्यात आली होती. शहरातील मंगल कार्यालय बुक केले होते. लग्नाचा बस्ता खरेदी केला होता. आयुष्यातील सर्वात मोठे वळणाअगोदर योगीराज साखरेने जग सोडले. यामुळे सोलापूर शहरात हळहळ व्यक्त होत आहे.