महिला आयोगाच्या अध्यक्ष रुपाली चाकणकर आणि राष्ट्रवादी युवक अध्यक्ष सूरज चव्हाण यांनी ट्विटरवरून सुप्रिया सुळे यांना धारेवर धरले आहे. मतदारसंघात उमेदवारांवर आरोप-प्रत्यारोप होत असताना, आता कौटुंबिक वाद चव्हाट्यावर आणला जात आहे. त्यामुळे मतदारसंघातील चुरस अधिक तीव्र झाली आहे.

राष्ट्रवादीचे अधिकृत उमेदवार बापू पठारे, त्यांचा मुलगा रवींद्र पठारे आणि कुटुंबातील इतर पाच जणांवर त्यांच्या सुनेने होत असलेल्या अत्याचाराच्या आरोपांची तक्रार महिला आयोगाकडे केली होती. हा प्रकार २०१९ मध्ये घडला होता, त्यावर महिला आयोगाने दखल घेत आयोगासमोर चौकशीसाठी उपस्थित राहण्याचे आदेश दिले होते. त्याचबरोबर चंदननगर पोलीस ठाण्यातही गुन्हा दाखल करण्यात आला होता. या तक्रारीचा मुद्दा पुन्हा उकरून काढत रुपाली चाकणकरांनी पठारे यांच्यावर निशाणा साधला आहे.

काही दिवसांपूर्वी अजित पवार यांनी सुनील टिंगरे यांच्या प्रचारासाठी वडगावशेरी मतदारसंघात सभा घेत शरद पवारांचे उमेदवार बापू पठारे यांना सज्जड दम दिला होता. त्याच रात्री सुप्रिया सुळे यांनी सभेतून सुनील टिंगरे यांच्यावर शरद पवारांनी नोटीस पाठवल्याचा आरोप केला होता. या घटनेनंतर मतदारसंघात आरोप-प्रत्यारोपांचे फैरी झडत आहेत आणि आता कौटुंबिक वादही सार्वजनिकरित्या उघड होत असल्याने वातावरण अधिक तापले आहे.