म. टा. प्रतिनिधी, छत्रपती संभाजीनगर : फारोळा येथील पंपहाऊसमध्ये शहराला पाणीपुरवठा करणारी ७०० मिलीमीटर व्यासाची जलवाहिनी फुटली. त्यामुळे जुन्या शहराला आज, मंगळवारी निर्जळीला सामोरे जावे लागणार आहे. विशेष म्हणजे काल, रविवारीदेखील याच ठिकाणी ही जलवाहिनी फुटली होती.
शहराला पाणीपुरवठा करण्यासाठी ७०० आणि १२०० मिलीमीटर व्यासाची पाणीपुरवठा योजना सध्या अस्तित्वात आहे. ७०० मिलीमीटर व्यासाच्या पाणीपुरवठा योजनेतून जुन्या शहराला पाणीपुरवठा होतो, तर १२०० मिलीमीटर व्यासाच्या पाणीपुरवठा योजनेवरून उर्वरित शहराला पाणीपुरवठा केला जातो.
सोमवारी काय घडले?
सोमवारी सकाळी दहा वाजेच्या सुमारास फारोळा पंपहाऊस येथे ७०० मिलीमीटर व्यासाच्या जलवाहिनीचा मॅनिफोल्ड पाइप फुटला, ही बाब लक्षात आल्यावर पाणीपुरवठा बंद न करता दुरुस्तीचे काम करण्याचा प्रयत्न पालिकेकडून सुरू करण्यात आला; परंतु त्यात यश आले नाही. त्यामुळे दुपारी पावणेचार वाजेच्या सुमारास जायकवाडीहून पाणी पुरवठा बंद करण्यात आला. पाणीपुरवठा बंद केल्यावर चार तासांपर्यंत त्या जलवाहिनीतून पाण्याचा प्रवाह सुरूच होता. जलवाहिनी रिकामी होण्यासाठी वेळ लागेल अशी माहिती कार्यकारी अभियंता के. एम. फालक यांनी दिली.
जलवाहिनी दुरुस्तीसाठी झाडांच्या मुळ्यांचा त्रास होत आहे असे ते म्हणाले. जलवाहिनी दुरुस्तीचे काम रात्री उशिरापर्यंत चालेल असे त्यांनी स्पष्ट केले. यामुळे जुन्या शहरात पाणी पुरवठा होणार नसल्याचे फालक म्हणाले. मंगळवारी देखील जुन्या शहरात पाणी पुरवठा होणार नाही अशी माहिती त्यांनी दिली. ७०० मिलीमीटर व्यासाची जलवाहिनी रविवारी देखील फारोळा पंपहाऊसच्या क्षेत्रात फुटली होती. वेल्डिंगचे काम झाल्यावर पाणी पुरवठा सुरु करण्यात आला होता; पण सोमवारी पुन्हा जलवाहिनी फुटल्यामुळे नागरिकांना निर्जळीला सामोरे जावे लागणार आहे.