नयन यादवाड, कोल्हापूर: धनंजय महाडिक यांच्या विरोधात २०१९ च्या निवडणुकीत आम्ही प्रचार केला ही आमची चूक झाली. निवडणुकीनंतर विद्यमान खासदार संजय मंडलिक यांचा कुठल्याही गावाशी संपर्क नाही. आम्ही सांगितलं तरी त्यांना आता कोणी मत देणार नाही. कुठेतरी दगा फटका झाला तर भाजपने काम केले नाही असा ठपका आमच्यावर नको म्हणून विद्यमान खासदार नको असे म्हणत भाजप प्रदेश कार्यकारिणीचे सदस्य संग्रामसिंह कुपेकर यांना विद्यमान खासदारांना विरोध केला आहे. यामुळे भाजप व शिवसेना शिंदे गट यांच्यामधील जागा वाटपामधील अंतर्गत वाद पुन्हा समोर आला आहे.
लोकसभा निवडणुकीचे बिगुल वाजले आहे. मात्र अद्याप महायुतीकडून जागावाटप जाहीर झालेले नाही. सध्या कोल्हापूर लोकसभा मतदारसंघ हा सध्या शिवसेना शिंदे गटाकडे आहे. मात्र या जागेवरून भाजप आणि शिवसेना या दोघांमध्ये वाद सुरू आहे. भाजप ही जागा मागत आहे मात्र एकनाथ शिंदे जागा भाजपला देण्यासाठी तयार नाहीयत. तर कोल्हापूर लोकसभा मतदारसंघातील विद्यमान खासदार संजय मंडलिक हे महायुतीचा उमेदवार मीच असणार असे ठामपणे सांगत मतदारसंघाचा दौरा देखील सुरू केला आहे.
दुसऱ्या बाजूला आता भाजप कार्यकर्त्यांमधूनच संजय मंडलिक यांना विरोध करण्यात येत आहे. चंदगड विधानसभा मतदारसंघाचे निवडणूक प्रमुख शिवाजीराव पाटील यांच्या अध्यक्षतेखाली हसुरचंपू येथे पार पडलेल्या भाजपच्या बूथप्रमुखांच्या मेळाव्यात भाजप प्रदेश कार्यकारिणीचे सदस्य संग्राम सिंह कुपेकर यांनी संजय मंडलिक यांना उमेदवारी देण्यास उघडपणे विरोध दर्शवला आहे. गेल्यावेळी त्यांचा प्रचार करून आम्ही डोके फोडून घेतले. निवडणुकीनंतर त्यांचा कुठलाही गावाशी संपर्क नाही. आम्ही सांगितले तरी लोक मत देणार नाहीत. कुठेतरी दगा फटका झाला तर भाजपने काम केले नाही, असा ठपका आमच्यावर नको. म्हणून विद्यमान खासदार सोडून दुसरा कोणीही उमेदवार चालेल. परंतु तो भाजपच्या कमळ चिन्हावर लढणारा हवा, अशी मागणी यावेळी कुपेकर यांनी केली आहे.
शिवसेना भाजपकडून हायजॅक? ४ उमेदवार बदलण्याची मागणी, शिंदेंकडे दिली यादी; भाई काय करणार?
गेल्यावेळेस चंदगड विधानसभा मतदारसंघात भाजप शिवसेना युतीचे उमेदवार म्हणून कुपेकर यांना संधी मिळाली होती. त्यामुळे भाजपचे शिवाजीराव पाटील यांनी बंडखोरी केली होती. दरम्यान खासदार संजय मंडलिक हे विकासाचा निधी शिवसैनिकांऐवजी राष्ट्रवादी काँग्रेसचे आमदार राजेश पाटील यांना देत असल्याची तक्रार ‘मातोश्री’कडे करत कुपेकरांनी भाजपमध्ये प्रवेश केला होता. ते खासदार धनंजय महाडिक यांचे जवळचे मानले जातात. अशातच कुपेकर यांनी केलेल्या या वक्तव्याची चर्चा सध्या जोरात सुरू आहे.