पुणे : पुण्यातील इंदापूर येथील खुनाची घटना ताजी असताना शिरूर तालुक्यातून एक धक्कादायक घटना समोर आली आहे. शिरूर तालुक्यातील अरणगाव येथील ठोंबरे वस्तीत दरोडेखोरांनी सशस्त्र दरोडा टाकला. यात वृध्द दाम्पत्याला बेदम मारहाण केली त्यात वृध्द महिलेचा मृत्यू झाला. त्यानंतर दरोडेखोरांनी दागिने आणि रोख रक्कम चोरुन नेली आहे. या घटनेनं शिरूर तालुक्यात एकच खळबळ उडाली आहे. तर या घटनेत एकजण गंभीर जखमी झाला आहे.फुलाबाई आनंदा ठोंबरे (वय ६५, ठोंबरेवस्ती, शिरूर) असं हल्ल्यात ठार झालेल्या वृद्ध महिलेचं नाव आहे. तर आनंदा सावळेराम ठोंबरे असं जखमी वृद्धाचे नाव आहे. या प्रकरणी आनंदा यांचा मुलगा बाबा ठोंबरे याने शिरूर पोलीस स्टेशनमध्ये तक्रार दिली आहे.
‘ते’ त्यांच्या कर्माने मरतील, त्यांच्या पराभवाचे धनी आपण व्हायला नको, मला शिंदे म्हणाले : विजय शिवतारे

पोलिसांनी दिलेल्या माहितीनुसार, शिरूर तालुक्यातील ठोंबरेवस्ती येथे आनंदा सावळेराम ठोंबरे हे त्यांची पत्नी फुलाबाई आनंदा ठोंबरे यांच्यासोबत वास्तव्यास आहेत. रविवारी रात्री ते त्यांची कामे आटोपून झोपले होते. मात्र, रात्री ३ वाजेच्या सुमारास अज्ञात दरोडेखोर ठोंबरे यांच्या घरात शिरले. आवाज झाल्याने ठोंबरे दाम्पत्य जागे झाले. त्यांच्यासमोर दरोडेखोर उभे होते. घरातील वस्तूंची दागिने चोरण्यासाठी गेले असता, या दाम्पत्याने त्यांना विरोध केला आणि आरडाओरडा करण्यास सुरुवात केली. मात्र, त्यांनी या दाम्पत्याला बेदम मारहाण केली. या मारहाणीत वृध्द महिलेचा जागेवर मृत्यू झाला आणि आनंदा ठोंबरे गंभीर जखमी झाले. ठोंबरे यांनी केलेल्या आरडाओरडामुळे परिसरातील नागरिक जागे झाले आणि त्यामुळे दरोडेखोर पसार झाले.

दरोडेखोरांनी दरोड्यात दागिने आणि रोख रक्कम चोरुन नेली असल्याचे सांगण्यात आले आहे. पोलिसांनी घटनास्थळी धाव घेत घटनेचा पंचनामा केला. अधिक तपास शिरूर पोलिस करत आहेत.