म. टा. प्रतिनिधी, पुणे: ‘पुणे महानगर परिवहन महामंडळा’चे (पीएमपी) सर्वाधिक प्रवासी उपनगर आणि शहर हद्दीबाहेरून पुण्यात काम आणि व्यवसायाच्या निमित्ताने येतात. या गोष्टीचा अभ्यास केल्यानंतर आता ‘पीएमपी’ शहराच्या हद्दीवर डेपोंची उभारणी करण्याचा विचार करीत असून, त्यासाठी जागांची आवश्यकता भासत आहे. या पार्श्वभूमीवर ‘पीएमपी’ने ‘पुणे महानगर विकास प्राधिकरणा’कडे (पीएमआरडीए) यापूर्वीच नऊ जागांची मागणी केली आहे. मात्र, हा प्रस्ताव सध्या धूळ खात पडून आहे.

डेपो शहरात; प्रवासी उपनगरांत

पुणे, पिंपरी-चिंचवड आणि ‘पीएमआरडीए’च्या हद्दीत ‘पीएमपी’कडून सार्वजनिक बससेवा दिली जाते. ‘पीएमपी’चे शहरात १५ डेपो असून, नव्याने डेपो उभारण्यासाठी जागा उपलब्ध नाहीत. सार्वजनिक बससेवेतून दररोज साधारणत: १२ ते १३ लाख प्रवासी प्रवास करतात. ‘पीएमपी’तून प्रवास करणाऱ्यांमध्ये उपनगर आणि ‘पीएमआरडीए’च्या हद्दीतील नागरिकांचे प्रमाण मोठे आहे. ‘पीएमपी’चे सर्व डेपो शहरातच असल्याने सकाळी प्रवाशांना आणण्यासाठी रिकाम्या बस घेऊन जावे लागते. रात्री प्रवाशांना सोडण्यासाठी जावे लागते. येताना बस रिकामी येते. त्यामुळे ‘पीएमपी’चा तोटा वाढत आहे.

कामावरुन परत जाताना काळाची झडप, भरधाव ट्रकची धडक अन् चार मजुरांनी जीव गमावला

रिकाम्या बसचे प्रमाण घटणार?

शहराच्या हद्दीवर ‘पीएमपी’च्या नव्या डेपोची स्थापना झाल्यास तेथूनच बस सकाळी शहरात येतील. त्यानंतर रात्री शहरातील प्रवासी घेऊन पुन्हा उपनगर आणि ‘पीएमआरडीए’च्या हद्दीत बस जातील. त्यामुळे रिकाम्या बस चालविण्याच्या त्रासातून ‘पीएमपी’ची सुटका होईल. भविष्याच्या दृष्टिकोनातून शहराच्या हद्दीवर काही डेपो तयार करावे लागणार आहेत. या पार्श्वभूमीवर ‘पीएमपी’कडून यापूर्वीच ‘पीएमआरडीए’कडे नऊ जागांची मागणी करण्यात आली होती. मात्र, याबाबत अद्याप कोणताही निर्णय झालेला नाही.

‘पीएमआरडीए’तील ११३ मार्गांवर सेवा

‘पीएमपी’कडून ‘पीएमआरडीए’च्या हद्दीतील ११३ मार्गांवर ४९० बसद्वारे सेवा दिली जाते. या सेवेच्या बदल्यात ‘पीएमआरडीए’ने गेल्या वर्षी १८७ कोटी रुपये ‘पीएमपी’ला दिले होते. या वर्षीची आपल्या वाट्याची रक्कम ‘पीएमआरडीए’ने अद्याप दिलेली नाही. ‘पीएमआरडीए’च्या काही जागांचा वापर ‘पीएमपी’कडून पार्किंग आणि डेपोसाठी करण्यात येत आहे. त्या बदल्यात ‘पीएमपी’ला लाखो रुपयांचे भाडे ‘पीएमआरडीए’ला द्यावे लागत आहे.

‘किमान पाच एकर जागा मिळावी’

‘पीएमपी’कडून भविष्यात ‘पीएमआरडीए’च्या हद्दीत डेपोंची उभारणी करण्यात येणार आहे. त्यासाठी नऊ ठिकाणी जागा देण्याची मागणी करण्यात आली आहे. ही जागा किमान पाच एकरची असावी; जेणेकरून तेथे डेपो उभारणे शक्य होईल, अशी ‘पीएमपी’ची मागणी आहे. या नऊ जागांच्या प्रस्तावावर अद्याप निर्णय झालेला नाही.

‘पीएमपी’च्या डेपोंचे जाळे

१५

एकूण डेपो

…

१७००

मार्गांवरील एकूण बस

…

१२ ते १३ लाख

दैनंदिन प्रवासी