म. टा. वृत्तसेवा, नवी मुंबई : पनवेलमधील वडघर येथील फ्लॅट विकत घेण्याच्या बहाण्याने बंटी बबलीने वाशीतील हिरो हाऊसिंग फायनान्स कंपनीकडे बनावट कागदपत्रे सादर करून या फायनान्स कंपनीकडून ३४ लाख रुपयांचे गृहकर्ज मिळवून कंपनीची फसवणूक केल्याचे उघडकीस आले आहे. ब्रिजेश सरोज व आशा पवार असे या बंटी बबलीचे नाव असून वाशी पोलिसांनी त्यांच्या विरोधात फसवणुकीसह बनावटगिरी केल्याप्रकरणी गुन्हा दाखल करून त्यांचा शोध सुरु केला आहे.या प्रकरणातील बंटी बबलीने पनवेलमधील वडघर येथील व्ही. बी. भोईर कन्स्ट्रक्शनच्या रियांश अपार्टमेंटमधील फ्लॅट विकत घेण्याचा बहाणा करून गृहकर्ज मिळवण्यासाठी वाशीतील हिरो हाऊसिंग फायनान्स कंपनीकडे सप्टेंबर २०२२मध्ये कागदपत्रे सादर केली होती. त्यांनतर फायनान्स कंपनीने त्यांच्या कागदपत्रांची तपासणी करून तसेच, गृहकर्जाची प्रक्रिया पूर्ण करून ऑक्टोबर २०२२मध्ये ‘बंटी बबली’ला ३४ लाख ५६ हजारांचे गृहकर्ज मंजूर करून त्याबाबतचे पत्र दिले. त्यानंतर त्यांनी भोईर कन्स्ट्रक्शन यांचे ना हरकत प्रमाणपत्र, डिमांड लेटर, फ्लॅटचा नोंदणीकृत मूळ दस्तऐवज आदी मूळ कागदपत्रे फायनान्स कंपनीकडे सादर केली. त्यानुसार फायनान्स कंपनीने ब्रिजेश सरोज व आशा पवार या बंटी बबलीसोबत कर्जाचा करार करून त्यांना नोव्हेंबर २०२२मध्ये ३४ लाख १० हजारांचा चेक भोईर कन्स्ट्रक्शन या नावाने दिला.
साकुर गावात तीव्र पाणीटंचाई, जल जीवन मिशनचे काम सुरू असूनही ग्रामस्थांची पाण्यासाठी वणवण..
त्यानंतर या ‘बंटी बबली’ने युनियन बँकेत भोईर कन्स्ट्रक्शन या नावाने बनावट खाते उघडून त्यात फायनान्स कंपनीने दिलेला गृहकर्जाचा चेक वटवून या रकमेचा अपहार केला. हा चेक वटल्यानंतर फायनान्स कंपनीने नियमानुसार भोईर कन्स्ट्रक्शनमध्ये संपर्क साधून गृहकर्जाबाबत चौकशी केली असता, प्रोप्रायटर विनोद भोईर यांनी त्या कंपनीकडून कुठल्याही प्रकारचे गृहकर्ज मिळाले नसल्याचे सांगितले. तसेच, त्यांच्या कंपनीचे युनियन बँकेत खातेही नसल्याचे सांगितले. त्यानंतर फायनान्स कंपनीने ‘बंटी बबली’ने गृहकर्ज मिळविण्यासाठी सादर केलेल्या कागदपत्रांची तपासणी केली असता, ती बनावट असल्याचे आढळून आले. त्यानंतर हिरो हाऊसिंग फायनान्स कंपनीने वाशी पोलिस ठाण्यात तक्रार दाखल केली.