पंकज मोहरीर, चंद्रपूर: राज्याच्या ताडोबा-अंधारी व्याघ्रप्रकल्पाच्या कोअर झोननमधील सफारीचे बुकिंग काही अपवाद वगळता ३१ मेपर्यंत फुल्ल झाले आहे. बफर झोनमध्ये काही प्रमाणात संधी आहेत. निवडणुकीच्या धामधुमीतही यानिमित्ताने ताडोबा पर्यटकांच्या गर्दीने फुलणार असल्याचे स्पष्ट झाले आहे.ताडोब्याला राष्ट्रीयच नव्हे तर आंतरराष्ट्रीयस्तरावर महत्त्वाचे स्थान आहे. वाघ-बिबट्याशिवाय या उद्यानात आढळणाऱ्या मगरी आणि गवा हे इथले मुख्य वैशिष्ट्य आहे. परिणामी या व्याघ्रप्रकल्पात पर्यटकांची संख्या वर्षागणिक वाढू लागली आहे. यंदाचा उन्हाळा तापदायक राहण्याची चिन्हे असल्याने पर्यटकांच्या संख्येवर परिणाम होणार, असा अंदाज वर्तविल जात होता. पण, मे महिन्यापर्यंत बुकिंग फुल्ल झाल्याने ताडोब्याकडे पर्यटकांचा ओढा दिसून आला आहे. कोअर झोनमधील सर्व सहाही गेट जवळपास काही अपवाद वगळता फुल्ल झाले आहेत. या कालावधीत नव्याने बुकिंगची आशा असणाऱ्यांचा हिरमोड होण्याची शक्यता आहे. बफरमध्ये तूर्त काही प्रमाणात संधी पर्यटकांना आहे. त्यामुळे वन्यप्रेमींचा हिरमोड होणार नाही, असे सूत्रांचे म्हणणे आहे. कोअरमध्ये झरी, पांगडी आणि बफरमधील बेलारा भागात व्याघ्रदर्शन होत असल्याने पर्यटकांची गर्दी वाढली आहे.

कामावरुन परत जाताना काळाची झडप, भरधाव ट्रकची धडक अन् चार मजुरांनी जीव गमावला

काळ्या बिबट्यांची संख्या चारवर

ताडोबा-अंधारी व्याघ्रप्रकल्पात तूर्त तीन काळ्या बिबट्यांचे दर्शन झाले आहे. यात एकाची भर पडून ही संख्या चारवर गेल्याची माहिती सूत्रांनी दिली आहे. यापूर्वी मार्च २०१९मध्ये प्रथमच ताडोब्यात काळा बिबट दिसून आला होता. आता पांगडी, जामनी व मदनापूर येथेही एका काळ्या बिबट्याचे दर्शन होत आहे. हा बिबट्या पर्यटकांसाठी नवे आकर्षण ठरला आहे. काळा बिबट्या हा सर्वसाधारण बिबट्याचाच भाग आहे. ती वेगळी प्रजाती नाही. शरीरात ‘मॅलेनीन’ रंगद्रव्य अधिक झाल्यास हा काळा रंग प्राप्त होतो. या बिबट्याच्या शरीरावर ठिपके पण दिसत आहेत.

विदर्भातील इतर प्रकल्पांकडेही ओढा

ताडोब्यातील बुकिंग फुल्ल झाल्याने पर्यटकांनी आता पेंच, नवेगाव-नागझिरा, मेळघाट व बोर व्याघ्रप्रकल्पाकडे आपला मोर्चा वळविला आहे. पेंच व्याघ्रप्रकल्पात सुटीच्या दिवशी पर्यटकांची अधिक संख्येत नोंद झाली. एवढेच नव्हे तर उमरेड-कऱ्हाडला अभयारण्यालाही पर्यटकांनी पसंती दर्शविली आहे. एकूणच ताडोब्यासह इतर प्रकल्पांकडील वाढता ओढा विदर्भात व्याघ्रपर्यटनाला सुगीचे दिवस येणार असल्याचे संकेत आहेत.

वर्षागणिक पर्यटकसंख्या

२०१७-१८ : १ लाख ६६ हजार ७८३

२०१८-१९ : १ लाख ८१ हजार ४६७

२०१९-२० : २ लाख २२ हजार ९३२

२०२०-२१ : १ लाख ६२ हजार ८२२

२०२१-२२ : १ लाख ६५ हजार ८२६

२०२२-२३ : २ लाख ८३ हजार ६१२

२०२३-२४ : सुमारे पावणे तीन लाखांहून अधिक