कल्याण : कल्याणमधील चिकणघर येथील होली क्रास शाळा भागात राहत असलेल्या एका माजी नगरसेवकाच्या चालकाच्या घरावर रविवारी रात्री अज्ञात व्यक्तीने बंदुकीने गोळीबार केला. या गोळीबारात घराचं नुकसान झालं आहे. गोळीबाराची घटना घडली त्यावेळी तक्रारदार वाहन चालकाची लहान मुलगी घरात खेळत होती, मात्र सुदैवाने ती वाचली. या गोळीबाराच्या घटनेत घरातील कोणीही सदस्य जखमी झाला नाही. महात्मा फुले चौक पोलीस ठाण्यात या गोळीबार प्रकरणी अज्ञाताविरुद्ध पोलिसांनी गुन्हा दाखल केला आहे.

दिनेश हरी जाधव (३७) असं तक्रारदार चालकाचं नाव असून कल्याण पश्चिमेकडे असलेल्या चिकणघरमधील होलीक्रास शाळेजवळच्या प्रगतीनगर चाळीत ते कुटुंबियांसह राहतात. ते कल्याणमधील एका माजी नगरसेवकाच्या गाडीवर चालक म्हणून नोकरी करतात.
चिमुकला शेतातून चारा आणायला गेला, परतताना बैलगाडी अचानक उलटली अन् होत्याचं नव्हतं झालं
या संदर्भात पोलीस सूत्रांकडून मिळालेल्या माहितीनुसार, रविवारी सुट्टीचा दिवस असल्याने तक्रारदार वाहनचालक दिनेश जाधव आपल्या गाळ्यातील भाडोत्री मोहन राम यांच्या सोबत रात्री साडेआठच्या सुमारास गप्पा मारत होते. त्यावेळी दिनेश यांची मुलगी मोठ्याने ओरडत दिनेश यांच्याजवळ आली आणि आपल्या घरात मोठा स्फोट झाला आहे, असं सांगितले. दिनेश आणि त्यांच्या साथीदारांनी तात्काळ घराकडे धाव घेतली.
जोडपं सिनेमा पाहून परतत होतं, पतीनं गाडी थांबवली, पत्नी खाली उतरताच अनर्थ अन् सुखी संसाराचं स्वप्न भंगलं
दिनेशची पत्नी दीपा यांनी दिलेल्या माहितीनुसार, घराच्या छपरावरून मोठ्याने आवाज होऊन बंदुकीची गोळी वेगाने घरात पडली. तक्रारदाराने तात्काळ घराच्या छतावर जाऊन पाहणी केली, त्यावेळी छतावरील पत्र्याला बंदुकीच्या गोळीच्या आकाराचं छिद्र पडल्याचं आढळलं. गोळीबाराची घटना घडली त्यावेळी दिनेश यांची लहान मुलगी देवस्वी ही बेडरूममध्ये खेळत होती. सुदैवाने खेळताना ती खोलीच्या एका बाजुला होती. अन्यथा बंदुकीची गोळी अथवा छताचा तुटलेला पत्रा डोक्यात पडून ती गंभीर जखमी झाली असती.

दिनेश यांनी ही माहिती तात्काळ महात्मा फुले चौक पोलिसांना दिली. पोलिसांनी पंचनामा करून बंदुकीची गोळी ताब्यात घेतली आहे. परिसरातून ही बंदुकीची गोळी कुठून आली याचा शोध पोलिसांनी सुरू केला आहे. राजकीय किंवा वैयक्तिक वादातून हा प्रकार घडला आहे का? या दिशेने पोलीस तपास करत आहेत.