मुंबई : केंद्रीय गृहमंत्री अमित शहा यांनी मंगळवारी मुंबईत येऊन महाराष्ट्रातील जागावाटपावर चर्चा केली. सह्याद्री अतिथीगृहावर झालेल्या बैठकीत शहांसोबत मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार उपस्थित होते. यावेळी एकनाथ शिंदेंनी आपल्या १३ खासदारांची तिकिटं न कापण्याची विनंती केली. मात्र भाजप ३२ जागा लढण्यावर ठाम असल्याची माहिती सूत्रांनी दिली आहे. त्यामुळे शिंदे गटातील काही खासदारांचा पत्ता कट होण्याची शक्यता वर्तवली जात आहे. अशातच भाजपच्या ३२ संभाव्य जागांवरील संभाव्य उमेदवारांची यादी सोशल मीडियावर व्हायरल झाली आहे.
गेल्या लोकसभा निवडणुकीत भाजपने ४८ पैकी २५, तर शिवसेनेने २३ जागा लढवल्या होत्या. भाजपने त्यापैकी अवघ्या दोन जागा गमावत २३ जागा जिंकल्या, तर शिवसेनेला १८ जागांवर विजय मिळाला. यापैकी १३ खासदार एकनाथ शिंदे यांच्यासोबत सत्तेत सहभागी झाले. पाच वर्षात भाजपची बार्गेनिंग पॉवरही वाढली आहे. त्यामुळे भाजप ३० हून अधिक जागांवर लढण्यावर ठाम असल्याचे बोलले जात आहे. शिवसेनाही आधी आपण लढवलेल्या २२-२३ जागांसाठी अडून बसली होती, परंतु भाजपकडून दबाव वाढत गेल्याचं बोललं जातं. अखेरीस शिवसेना विद्यमान १३ जागा तरी टिकून राहण्यासाठी आग्रही आहे.
भाजपच्या कोअर कमिटीची आज महत्त्वाची बैठक होणार असून महाराष्ट्रातील उमेदवारांवर शिक्कामोर्तब होणार आहे. लोकसभा निवडणुकांसाठी भाजपची पुढची यादी सात किंवा आठ मार्चला जाहीर होणार आहे. त्याआधी जागावाटप आणि उमेदवारांची यादी अंतिम टप्प्यात आली आहे. दरम्यान भाजपच्या ३२ संभाव्य उमेदवारांची नावं चर्चेत आहेत.
भाजपच्या विद्यमान जागा
१. नंदुरबार : हीना गावित (विद्यमान खासदार) किंवा विजयकुमार गावित
२. धुळे : सुभाष भामरे यांच्याऐवजी प्रताप दिघावकर यांना उमेदवारीची शक्यता
३. जळगाव : उन्मेष पाटील (विद्यमान खासदार) किंवा ए टी नाना पाटील
४. रावेर : रक्षा खडसे यांच्याऐवजी अमोल जावळे यांच्या नावाची चर्चा
५. अकोला : संजय धोत्रे (विद्यमान खासदार)
६. नागपूर : नितीन गडकरी (विद्यमान खासदार आणि केंद्रीय मंत्री)
७. भंडारा-गोंदिया : सुनिल मेंढे (विद्यमान खासदार)
८. गडचिरोली : अशोक नेते यांच्याऐवजी राष्ट्रवादीचे मंत्री धर्मरावबाबा अत्राम भाजपच्या चिन्हावर लढण्याची चर्चा
९. नांदेड : प्रताप पाटील चिखलीकर यांच्याऐवजी मिनल खतगावकर
१०. जालना : रावसाहेब दानवे (विद्यमान खासदार आणि केंद्रीय राज्यमंत्री)
११. दिंडोरी : भारती पवार (विद्यमान खासदार आणि केंद्रीय राज्यमंत्री)
१२. भिवंडी : कपिल पाटील (विद्यमान खासदार)
१३. उत्तर मुंबई : गोपाळ शेट्टी यांच्याऐवजी केंद्रीय मंत्री पियुष गोयल यांच्या उमेदवारीची शक्यता
१४. उत्तर मध्य मुंबई : पूनम महाजन यांच्याऐवजी आशिष शेलार यांच्या उमेदवारीची चर्चा
१५. ईशान्य मुंबई : मनोज कोटक (विद्यमान खासदार)
१६. पुणे : गिरीश बापट यांच्या निधनानंतर मुरलीधर मोहोळ
१७. अहमदनगर : सुजय विखे पाटील यांच्याऐवजी राधाकृष्ण विखे पाटील किंवा राम शिंदे
१८. बीड : प्रीतम मुंडे यांच्याऐवजी भगिनी पंकजा मुंडे
१९. सोलापूर : जयसिद्धेवर स्वामी यांच्याऐवजी अमर साबळेंच्या नावाची चर्चा
२०. माढा : रणजितसिंह निंबाळकर (विद्यमान खासदार)
२१. सांगली : संजयकाका पाटील यांच्याऐवजी विशाल पाटील भाजपप्रवेश करुन लढण्याची चर्चा
२२. वर्धा : रामदास तडस (विद्यमान खासदार) यांची उमेदवारी निश्चित नाही
२३. लातूर : सुधाकर शृंगारे (विद्यमान खासदार) यांची उमेदवारी निश्चित नाही
माझ्या १३ खासदारांची तिकिटं तरी कापू नका, शिंदेंची विनंती, शहा म्हणाले, एक गोष्ट समजून घ्या…
युतीतील भाजपच्या पारंपरिक जागा
बारामती : राष्ट्रवादीला जागा सोडण्याची चिन्हं (जागा सध्या पवार गटाकडे)
२४. चंद्रपूर : सुधीर मुनगंटीवार यांच्या नावाची चर्चा (जागा सध्या काँग्रेसकडे, मात्र धानोरकरांच्या निधनाने रिक्त)
एकनाथ शिंदे यांच्या नेतृत्वातील शिवसेनेकडील विद्यमान जागा
२५. हिंगोली : विद्यमान खासदार हेमंत पाटील यांच्या जागेवर भाजपकडून तानाजी मुरकुटे यांच्या उमेदवारीची चर्चा
२६. कोल्हापूर : विद्यमान खासदार संजय मंडलिक यांच्या जागेसाठी भाजप इच्छुक
२७. पालघर : विद्यमान खासदार राजेंद्र गावित भाजपात घरवापसी करुन लढण्याची शक्यता
Read Latest Maharashtra News Updates And Marathi News
युतीत शिवसेनेकडे असलेल्या पारंपरिक जागा
२८. ठाणे : डॉ. संजीव नाईक (जागा सध्या ठाकरे गटाकडे)
२९. धाराशिव : बसवराज पाटील (जागा सध्या ठाकरे गटाकडे)
३०. रत्नागिरी-सिंधुदुर्ग : नारायण राणे (जागा सध्या ठाकरे गटाकडे) शिंदेंकडून किरण सामंत इच्छुक
३१. छत्रपती संभाजीनगर : अतुल सावे किंवा केंद्रीय राज्यमंत्री भागवत कराड (जागा सध्या एमआयएमकडे)
३२. अमरावती : नवनीत राणा (विद्यमान अपक्ष खासदार) राणांचा भाजपप्रवेश होण्याची चर्चा, मात्र शिंदेंकडून आनंदराव अडसूळ इच्छुक