बीड: सध्या बीड जिल्ह्यात कार्यकर्त्यांची अफरातफर मोठ्या प्रमाणात सुरू आहे. कोणी या पक्षातून त्या पक्षात, त्या पक्षातून दुसऱ्या पक्षात हे सध्या लोकसभा निवडणुकीच्या पार्श्वभूमीवर होताना पाहायला मिळत आहे. यामध्येच सध्या बीड जिल्ह्यात राष्ट्रवादीचं चांगलंच वर्चस्व असल्याचं पाहायला मिळत आहे. त्याच पार्श्वभूमीवर आज बीडमधून तब्बल ३०० गाड्या सहित हजारो कार्यकर्ते हे मुंबईत राष्ट्रवादी म्हणजेच अजित पवार गटात प्रवेश करणार आहेत.
बीड जिल्ह्यात सध्या पाहायला गेलं तर राष्ट्रवादी आणि भाजप अशी लढत पाहायला मिळते. त्यातच राजकीय सत्ता संघर्षाचे महानाट्य पार पडल्यानंतर जवळपास सगळ्या जिल्ह्यात संभ्रम असलेली अवस्था पाहायला मिळत आहे. कोणत्या पक्षात कोण आहे हे कळणे मुश्किल झालं आहे. त्यातच बीड जिल्ह्यात आज मोठी खळबळ पाहायला मिळाली. एकेकाळी आमदार संदीप क्षीरसागर ज्या आजी-माजी नगरसेवकांच्या मदतीने आमदारकीपर्यंत पोहोचले, तेच नगरसेवक आता अजित पवार गटात सामील होत आहेत. त्यात संदीप क्षीरसागर यांचे खंदे कार्यकर्ते म्हणून अमर नाईकवाडे फारुख पटेल आणि मोहीम मास्टर यांचा संदीप क्षीरसागर यांच्या आमदारकीसाठी मोठा वाटा मानला जातो.
अजित पवार यांच्या राष्ट्रवादीत प्रवेश करणारे कार्यकर्ते हे काही वंचित बहुजन आघाडीतील, काही उद्धव ठाकरे गटातली, काही शिवसेना शिंदे गटातील आहेत. इतकंच नाही तर यात काही भाजपचे नगरसेवकही असल्याची माहिती आहे. मात्र या प्रवेशांनंतर बीड जिल्ह्यातील नगरपालिकेच्या निवडणुकांवर देखील मोठा परिणाम होणार असल्याचं चित्र आहे. कारण, बीडच्या नगरपालिकेवर आत्तापर्यंत एकहाती सत्ता असलेले क्षीरसागर कुटुंब विभाजित झाल्यानंतर आता भावी नगरसेवक होण्याची इच्छा दर्शवणारे क्षीरसागर कुटुंबातीलच योगेश क्षीरसागर यांना देखील या प्रवेशाने फटका बसण्याची शक्यता नाकारता येत नाही.
मात्र, बीड जिल्ह्यात अविनाश नाईकवाडे हे संदीप क्षीरसागर यांना सोडल्यानंतर त्यांनी क्षीरसागर कुटुंबातील ज्येष्ठ राजकारणी म्हटल्या जाणाऱ्या जयदत्त क्षीरसागर हे ज्यावेळेस शिवसेनेत उद्धव ठाकरे गटात होते, त्यावेळेस त्यांच्यासोबत प्रवेश करत आतापर्यंत पाहायला मिळत होते. मात्र, मधला काही काळ त्यांनी विना पक्षाचाच काढला. आता त्यांचा प्रवेश अजित पवार गटात होत असल्याने आणि कोणताही राजकीय वारसा नसतानाही बीड जिल्ह्यात आणि बीड शहरात स्वतःचं वर्चस्व असल्याने अमर नाईकवाडे व त्यांच्यासोबत असलेली ही सगळी कार्यकर्त्यांनी राष्ट्रवादीत प्रवेश केल्यानंतर आता बीड जिल्ह्यातील समीकरण बदलणार आहे. कारण, शरद पवार गटातील आमदार संदीप क्षीरसागर या प्रवेशाने यांना मोठी डोकेदुखी होणार असल्याने आणि दुसरीकडे अजित पवार गटातच असलेले योगेश क्षीरसागर हे आता भावी नगरसेवक होण्याचे स्वप्न पाहत असतानाच अमर नाईकवाडे यांचा प्रवेश योगेश क्षीरसागरांसाठी मोठा फटका ठरणार का, हे देखील पाहणं गरजेचं आहे.