नाशिक : नाशिक लोकसभा मतदारसंघात उमेदवार कोण असेल, कुठल्या पक्षाला ही जागा सुटेल याबाबत अगदी गल्लीपासून दिल्लीपर्यंत संभ्रम असल्याचे बघायला मिळत आहे. महाविकास आघाडी आणि महायुती यांच्यात नाशिक लोकसभा जागेवरून अंतर्गत संघर्ष बघायला मिळत आहे. तर दुसरीकडे गृहीत धरण्यासारखे तब्बल दीड डझन इच्छुक या मतदारसंघात गुडघ्याला बाशिंग लावून तयारीत आहेत. काही इच्छुकांची तयारी आणि मोर्चेबांधणी इतकी जोरदार झाली आहे की उमेदवारी न मिळाल्यास १०० टक्के बंडखोरी होणार असे चित्र आहे. यात सर्वाधिक इच्छुक असलेल्या भारतीय जनता पार्टीला बंडखोरीचा सगळ्यात आधी फटका बसेल असे दिसते.

नाशिक महानगर पालिकेत काँग्रेसकडून विरोधीपक्ष नेते आणि भाजपाकडून सभागृह नेते राहिलेले दिनकर पाटील हे देखील दीड डझन इच्छुकांपैकीच एक आहेत. त्यांनी मागील २ ते ३ वर्षांपासूनच लोकसभा निवडणूक लढवण्यासाठी तयारीला सुरुवात केली आहे. त्यांचा पूर्व इतिहास बघता पाटील थांबणार नाहीत असे त्यांचे जवळचे कार्यकर्ते सांगतात. खरं तर, भाजपच्या अंतर्गत सर्व्हेत नाशिक लोकसभा मतदारसंघाचे विद्यमान खासदार हेमंत गोडसे यांच्यावर नाराजी असल्याचे समोर आल्याची सूत्रांची माहिती आहे. तसेच नाशिक लोकसभेत शिंदे गटापेक्षा भाजपाची ताकद जास्त असल्याने भाजपाकडून हा मतदारसंघ मागितला जातोय.

या मतदारसंघासाठी भाजपने वरिष्ठ पातळीवर जोर लावला असल्याचे बोलले जात आहे. त्यासाठी भाजपाकडून विद्यमान आमदार राहुल ढिकले, केदार आहेर, आमदार राहुल आहेर यांच्या नावांची चर्चा घडवून आणली जात आहे. दुसरीकडे भाजपाचे नाशिक महापालिकेतील माजी सभागृह नेते दिनकर पाटील यांनी देखील आपली वैयक्तिक तयारी सुरू केली आहे. नुकताच पाटील यांचा 3 वर्षांनी अर्थात 29 फेब्रुवारी रोजी वाढदिवस साजरा झाला. त्यासाठी त्यांनी अगदी गावागावात आपले शुभेच्छा फलक लावले आणि त्यावर “भावी खासदार” असा मजकूर टाकून अप्रत्यक्षपणे आपल्या उमेदवारीची घोषणाच करून टाकली.
आधी बारामती उरकतो मग पुणे आहेच, अजितदादांचा लेक जय पवारांचे पुण्यात अ‍ॅक्टिव्ह होण्याचे संकेत

मनसेची देखील चाचपणी

मध्यंतरी मनसे अध्यक्ष राज ठाकरे नाशिक मध्ये आले असताना दिनकर पाटील यांच्या मनसे प्रवेशाची जोरदार चर्चा झाली होती. अगदी मनसेच्या महत्वाच्या स्थानिक पदाधिकाऱ्यांकडून देखील आजही मनसेचे लोकसभेचे उमेदवार दिनकर पाटील असतील असे बोलले जात आहे. त्यामुळे पाटील यांच्याकडून देखील भाजपा सोडून इतर पर्यायांची चाचपणी सुरू असल्याचे लपून राहिलेले नाही. काँग्रेस मध्ये असल्यापासून ते मध्यंतरी बहुजन समाज पार्टीकडून लोकसभेची उमेदवारी करण्यापर्यंतचा त्यांचा प्रवास तसेच स्वतः सभागृह नेते असताना महापालिकेतील सत्ताधारी असलेल्या स्वतःच्याच पक्षाच्या विरोधात घेतलेली भूमिका बघता पाटील यांची महत्वाकांक्षा लपून राहिलेली नाही.
नाना पटोलेंविरोधात पुन्हा असंतोष, १२ निष्ठावंतांची गुप्त बैठक, असंतुष्ट गट दिल्लीला रवाना

शिंदे गट नाशिक लोकसभेवर ठाम

दिनकर पाटील यांचा स्वभाव आणि राजकीय प्रवास बघता यंदा कोणत्याही परिस्थितीत ते लोकसभेसाठी उमेदवारी करणारच असे चित्र आहे. एकीकडे राज्य पातळीवर विद्यमान खासदार ज्यांचा त्याच पक्षाला जागा असा फॉर्म्युला ठरला असल्याचे बोलले जात आहे. तसेच पालकमंत्री दादा भुसे यांनी देखील नाशिक लोकसभा शिवसेनाच लढवेल असे ठामपणे सांगितले आहे. त्यामुळे जर शिवसेनेलाच हा मतदारसंघ सुटला तर दिनकर पाटील बंडखोरी करणारच हे मात्र निश्चित झाले आहे. तसेच त्यांनी देखील आपल्या वाढदिवसाला अप्रत्यक्षपणे लोकसभेचे रणशिंग देखील फुंकले आहे.

Read Latest National News Updates And Marathi News

भाजपला आव्हान

बंडखोरी आणि पक्ष शिस्तीच्या विरोधात जाऊन काही काम करणे भारतीय जनता पार्टीत खपवले जात नाही. देशात मोदींना मोठ्या फरकाने निवडून आणण्यासाठी तसेच “चारसो पार” हे ध्येय गाठण्यासाठी महाराष्ट्रावर विशेष लक्ष दिलेलं असताना दिनकर पाटील यांचा वारू कसा थोपवला जातो, बंडखोरी कशी शमवली जाते हे बघणे भविष्यात महत्वाचे असणार आहे.