म. टा. वृत्तसेवा, पनवेल : मालमत्ता कर न भरलेल्या थकबाकीदारांना जप्तीपूर्व नोटिसा बजावण्यास पनवेल महापालिकेने सुरुवात केली आहे. आयुक्त गणेश देशमुख यांनी थकीत करवसुलीबाबत आक्रमक भूमिका घेतल्यानंतर काही दिवसांपूर्वीच या थकबाकीदारांची यादी प्रसिद्ध करून दणका दिला होता. आता आणखी एक पाऊल पुढे टाकत सोमवारपासून मालमत्ता जप्तीच्या नोटिसा वाटण्यास प्रशासनाने सुरुवात केली आहे.
पनवेल महापालिका क्षेत्रात तीन लाख ५० हजार मालमत्ता करधारक आहेत. यातील केवळ ७७ हजार मालमत्ताधारकांनी प्रतिसाद दिला आहे. तब्बल दोन लाख ८० हजार मालमत्ताधारकांनी मालमत्ता कर भरण्याकडे पाठ फिरवली आहे. चालू आर्थिक वर्षात मात्र महापालिकेने आक्रमक पवित्रा घेतल्यानंतर १७ एप्रिलपासून आजपर्यंत २६१ कोटी रुपयांची वसुली झाली आहे. मालमत्ता करवसुलीसाठी प्रशासनाने वेगवेगळ्या पद्धतीने दबाव आणून करवसुली करण्याचा प्रयत्न केला. परंतु अपेक्षेप्रमाणे यश आले नाही. त्यामुळे दीड ते १० लाखांपर्यंत थकबाकी असणाऱ्यांची नावे जाहीर करून आयुक्त गणेश देशमुख यांनी जप्तीचा इशारा दिला. यामध्ये १०१ औद्योगिक, १०७ अनिवासी, १०० निवासी थकबाकीदारांचा समावेश आहे. त्यांना कर भरण्यासाठी मुदत देण्यात आली होती. ही मुदत संपताच ४८ जप्तीपूर्व नोटिसा देण्यास सुरुवात केली.
सात दिवसांनंतर वॉरंट
नावे प्रसिद्ध केल्यानंतर १५ दिवसांची मुदत देणाऱ्या पालिकेने नोटीस दिल्यानंतर पुन्हा सात दिवसांची मुदत कर भरण्यासाठी दिली आहे. परंतु सात दिवसानंतर करबुडव्यांवर वॉरंट काढून ‘महाराष्ट्र महानगरपालिका अधिनियम कलम १२८’ व ‘अनुसूची ड प्रकरण ८ कराधान नियम ४७’ अन्वये महानगरपालिकेस देय असलेल्या कराच्या थकबाकीपोटी जंगम, स्थावर मालमत्ता जप्त अथवा अटकावणी करून जाहीर लिलावाने विक्री करून थकबाकी वसूल करण्याची कारवाई केली जाईल.
मालमत्ता कर न भरल्यास त्याच्या शास्तीमध्ये प्रतिमहा दोन टक्क्यांची वाढ होत असल्याने नागरिकांनी आपला मालमत्ता कर भरावा. रिक्षांमधून लाऊड स्पीकरच्या माध्यमातून चारही प्रभागांमध्ये याबाबतचे आवाहन केले जात आहे. महापालिकने मालमत्ता कर ऑनलाइन भरण्यासाठी मोबाइल ॲप विकसित केले आहे. तसेच, मालमत्ताधारकांना काही शंका असल्यास १८००-५३२०-३४० या टोल फ्री क्रमांकावर संपर्क साधावा.- गणेश शेट्ये, उपायुक्त, पनवेल महापालिका