अकोला : बारावीच्या परीक्षेमधील गैरप्रकार टाळण्यासाठी शिक्षण विभागाने विविध उपाय योजनांची अंमलबजावणी केली आहे. तरीही बारावीच्या पहिल्याच पेपरला कॉपी पुरवण्यासाठी अजब शक्कल लढवल्याचा धक्कादायक प्रकार समोर आला आहे. परीक्षा केंद्रावर बहिणीला कॉपी पुरवण्यासाठी चक्क भाऊच तोतया पोलीस कर्मचारी बनल्याचा प्रकार उघडकीस आला आहे.
अकोला जिल्ह्यातील पातुर शहरातल्या शाहबाबू उर्दू हायस्कूल इथे बारावीच्या परीक्षा सुरू आहेत. या परीक्षेदरम्यान काल, २१ फेब्रुवारीला चक्क पोलिसांचा गणवेश धारण करून केंद्रावर रुबाबात कॉपी पुरवण्यासाठी आलेल्या तोतया पोलिसाचं बिंग सॅल्यूट करतानाच फुटलं आणि हा सर्व प्रकार उघडकीस आला. अनुपम मदन खंडारे (वय २४, राहणार पांगरा बंदी) असं या तोतया पोलिसाचं नाव आहे.
कालपासून बारावीच्या परीक्षा सुरू झाल्या असून या परीक्षेमध्ये विद्यार्थ्यांनी कॉपी करू नये, यासाठी वेगवेगळी पथकं तयार करण्यात आली आहेत. तरी, देखील पातुरच्या शाहाबाबु हायस्कूल इथे एका परीक्षार्थी मुलीचा भाऊ अनुपम खंडारे हा कॉपी पुरवण्यासाठी थेट पोलिसाचा गणवेश परिधान करून नकली पोलीस बनला.
तोतया पोलिसाचा पर्दाफाश कसा झाला?
बहिणीला कॉपी देण्यासाठी तरुण परीक्षा केंद्रावर इकडे तिकडे फिरू लागला. तेवढ्यात पातूर पोलिस स्टेशनचे पोलीस निरीक्षक किशोर शेळके हे आपल्या ताफ्यासह या परीक्षा सेंटरवर बंदोबस्तासाठी पोहचले. यावेळी त्या ठिकाणी अनुपम मदन खंडारे हा देखील होता.
रायगड जिंकण्यासाठी जेव्हा मविआला जाग येते; सुनील तटकरेंचा मोठा भाऊ शरद पवार गटात
पोलिसांच्या वरिष्ठ अधिकाऱ्यांना पाहतात तोतयाने त्यांना सल्यूट ठोकला. परंतु पोलिसांना त्याचा सॅल्युट पाहून त्याच्यावर संशय आला. तसेच त्याने घातलेला गणवेश, त्यावरील नेम प्लेट चुकीची असल्याने हा सर्व प्रकार उघडकीस आला.
Read Latest Maharashtra News Updates And Marathi News
पोलिसांनी त्याची चौकशी केली असता त्याच्या पॉकेटमध्ये इंग्रजी विषयाची कॉपी चिट्स सापडल्या. या प्रकरणी ४१७, ४१९, १७०, १७१ आणि अधिनियम १९८२ चे कलम ७ नुसार गुन्हा दाखल करण्यात आला.