लातूर : महाराष्ट्राला काका पुतण्याच्या संघर्षाचा फार मोठा इतिहास आहे. परंतु काँग्रेसला काका पुतण्याचं नातं धार्जिणं आहे हे दिलीपराव देशमुख आणि अमित देशमुख यांच्याकडे पाहिल्यावर कळतं, असे वक्तव्य राष्ट्रवादीचे प्रदेशाध्यक्ष जयंत पाटील यांनी केले. ज्येष्ठ नेते शरद पवार यांच्याविरोधी भूमिका घेऊन अजित पवार यांनी भाजपशी हातमिळवणी केल्याने सध्या पवार कुटुंबात कटुता निर्माण झाली आहे. याच पार्श्वभूमीवर जयंत पाटील यांनी देशमुख काका पुतण्याचा विशेष नामोल्लेख करत पवार काका पुतण्यामध्ये पडलेल्या संघर्षाच्या ठिणगीवरून खंत व्यक्त केली.

महाराष्ट्राचे मुख्यमंत्री म्हणून आपल्या कामगिरीने अवीट छाप उमटवलेले आणि आपल्या संघटन कौशल्याने काँग्रेसच्या केंद्रीय नेतृत्वाला दखल घ्यायला भाग पाडलेले दिवंगत नेते विलासराव देशमुख यांच्या पूर्णाकृती पुतळ्याचे उद्घाटन आज लातूरमध्ये पार पडले. या सोहळ्याला राज्यातील काँग्रेसचे सगळेच ज्येष्ठ नेते तसेच तरुण तुर्क नेते उपस्थित होते. प्रत्येक नेत्याने विलासरावांच्या कार्यकर्तृत्वावर प्रकाश टाकताना त्यांच्यासोबतच्या अनेक आठवणींना उजाळा दिला.
अमितभैय्या तुमच्याकडून महाराष्ट्राच्या अपेक्षा, आता वेळ आलीये-पाऊल टाका : रितेश देशमुख

काका पुतण्याचं नातं काँग्रेसला धार्जिणं

आपल्या भाषणात जयंत पाटील म्हणाले, काँग्रेसचं बरंय… काका पुतण्या नातं काँग्रेसला धार्जिणं आहे. दिलीपराव देशमुख इतक्या उत्तमपणे नेतृत्व करत आहेत. पण, त्यांचे आणि अमित देशमुख यांचे संबंध मधूर आहेत. शेवटी व्यक्तिगत नातं टिकवताना राजकारणात कुणी कसंही वागलं, तरी चालते. पण, व्यक्तिगत नाते तोडण्याची भूमिका कुणी राजकारणासाठी घेता कामा नये, पण आता त्याही गोष्टी व्हायला लागल्या आहेत, अशी खंत जयंत पाटील यांनी व्यक्त केली. एकेकाळी भक्कम अशी काँग्रेस महाराष्ट्रात उभी होती. माझं आजही असं मत आहे की, ती विलासराव देशमुखांच्या नेतृत्वामुळेच होती, असंही जयंत पाटील म्हणाले.
विलासरावांच्या आठवणीत रितेशला रडू कोसळलं, हुंदके देत देत भाषण, अमित देशमुखांनी सावरलं

विलासरावांचं स्थान काय होतं हे अनेकांच्या डोळ्यातील पाणी पाहून कळतं

स्व. विलासराव देशमुख यांना जाऊन अनेक वर्षे झाली, पण उपस्थितांच्या डोळ्यातील पाणी पाहून आजही त्यांचे लोकांच्या मनातील स्थान कायम आहे हे सिद्ध होते. लोकं एखाद्या व्यक्तिला त्यांनी केलेल्या चांगल्या कामामुळे स्मरणात ठेवतात. स्व. विलासराव देशमुख साहेब यांनी मराठवाड्यासाठी आणि संपूर्ण राज्यासाठी विस्तृत काम केले आहे. आटपाडीच्या साखर कारखान्याच्या उद्घाटनप्रसंगी ते आले होते. तेव्हा त्यांचे भाषण पहिल्यांदा ऐकलं. राजकारण्याने कसे भाषण करावे हे विलासरावांकडून शिकले पाहिजे. मी त्यांच्या मंत्रिमंडळात अधिकतम काम केले आहे. त्यामुळे त्यांचे आणि माझे घनिष्ट ऋणानुबंध होते.
कॉंग्रेस सोडून अशोक चव्हाणांच्या हाती कमळ; देशमुख बंधू काय निर्णय घेणार? चर्चांना उधाण

विलासराव आज असते तर काँग्रेसच्या संकटाच्या काळात उभे ठाकले असते

त्याकाळी फार वेगळे राजकीय संस्कार आम्ही अनुभवले. म्हणून महाराष्ट्राला विकासाच्या मार्गावर नेऊ शकलो. आज स्व. विलासराव देशमुख साहेब असते तर काँग्रेसच्या संकटाच्या काळात उभे ठाकले असते. आज राज्यातील काँग्रेस भक्कम पाय रोवून उभी आहे ती विलासराव देशमुख साहेबांमुळे.

लातूरकरांनी महाराष्ट्राची राजकीय संस्कृती टिकवण्यासाठी पुढाकार घ्यावा

आता राजकारणाचा काळ फार बदलला आहे. भाषा, कृत्य सर्वच स्तरावर पातळी घसरली आहे. राजकारणात गुंडगिरी वाढली आहे. मंत्रिमंडळात सुसंवाद नाही. सर्वच बाबतीत राज्याचा आलेख उतरता आहे. लातूरकरांनी महाराष्ट्राची राजकीय संस्कृती टिकवण्यासाठी पुढाकार घ्यावा, असं आवाहन जयंतरावांनी केलं.